Presidente do Parlamento Nacional, Aniceto Longuinhos Guterres Lopes, acompanha hussi Vice-Presidente na’in rua, Deputado Júlio Sarmento da Costa «Meta Malik» no Deputado António Verdial de Sousa, no mos representante líder bancada sira, lança oficialmente Rádio Parlamento Nacional (FM 92.9 Mhz), no Portal foun Parlamento Nacional (www.parlamento.tl), iha loron 6 fulan junho tinan 2018, iha Parlamento Nacional.
Presidente do Parlamento Nacional iha nia discurso hatete objetivo estratégico atu cria Rádio Parlamento Nacional ne’e hodi promove cultura transparência no democracia ba sociedade civil no cidadão hotu, atu hola parte iha processo político, liuliu atu hatene papel no ação sira Deputado sira nian iha Parlamento Nacional, no bele mos sai hanessan matéria educação cívica ba cidadão hotu.
Secretário-Geral do Parlamento Nacional, Adelino Afonso de Jesus, hatete hanoin atu harii rádio parlamentar ne’e, hahú kedas iha Legislatura dahuluk nian, ne’ebé foin concretiza iha Legislatura ida-ne’e.
Iha lançamento simbólico, ba portal foun Parlamento Nacional, halo mós bênção ba estúdio rádio nian hussi reverendo padre Evaristo Fernandes da Costa Soares.
Participa iha cerimónia ne’e mak hanessan: Presidente do Conselho da Imprensa, Virgílio Guterres, Diretor sira hussi órgão Comunicação Social sira, no inclui estrutura tomak Secretariado Parlamento Nacional, ho nia funcionário tomak.
