Papel e Organização

Pagina Inicial»Noticia

Papel e Organização

Parlamento Nacional de Timor-Leste nu’udar órgão soberania nian ida ne’ebé consagra iha Constituição, “ne’ebé representa cidadão Timor hotu-hotu no kaer poder legislativo no poder ba fiscalização no decisão política” (artigo 92.º Constituição nian).

 

Poder no competências Parlamento Nacional nian, ninia relacionamento ho órgãos de soberania no Estado nian sira seluk, iha respeito ba princípio separação no interdependência poder sira-nian, no mós direitos no deveres Deputado sira-nian, hakerek iha diploma fundamental tolu: Constituição da República Democrática de Timor-Leste, Regimento Parlamento Nacional nian no Estatuto Deputado sira-nian.

 

Iha órgãos de soberania seluseluk nia sorin - Presidente da República, Governo e Tribunal sira –, Parlamento nu’udar ai-riin regime democrático nian no hala’o papel central iha sistema governo ne’ebé hatuur iha Constituição.

 

Página ida-ne’e nia objetivo mak atu fó-biban ba cidadão atu hatene di’ak liu tan kona-ba Parlamento Nacional no, ikus mai, contribui ba exercício informado ba nia direitos ne’ebé hatuur iha Constituição.

Parlamento Nacional nia competências

Além de ninia função atu representa cidadão timoroan hotu-hotu, Parlamento mak órgão legislativo principal, ne’ebé kaer poder aas liu atu halo lei, mesmo bainhira Governo mak hola iniciativa, no atu controla atos legislativos husi Governo, ne’ebé, iha circunstância balu, Parlamento bele aprecia filafali.

 

Hanesan mós acontece iha ordenamento jurídico seluseluk, iha Timor-Leste la’ós Parlamento de’it mak iha competência atu aprova lei. Governo mós iha poder legislativo. Maibé, iha matéria balu – cidadania, divisão territorial, partidos no associações políticas, política kona-ba defesa no segurança, entre sira seluk – ne’ebé Parlamento de’it mak bele halo lei (artigo 95.º Constituição nian). Kona-ba buat sira-ne’e Parlamento iha competência legislativa exclusiva. Iha matéria seluseluk – definição ba crime, pena, medida ba segurança no sira-nia pressuposto, regime geral ba função pública, ba funcionário sira-nia estatuto no ba Estado nia responsabilidade, entre sira seluk - ne’ebé Governo bele halo lei ho autorização husi Parlamento (artigo 96.º Constituição nian).

 

Iha âmbito função fiscalização política, Parlamento tau matan ba respeito ba Constituição no ba lei, no acompanha atividade husi Governo no Administração Pública (ne’ebé nia órgão superior mak Governo).

 

Depois de ninia nomeação, Governo sei hato’o ninia programa ba Parlamento hodi nia bele aprecia. Durante debate parlamentar kona-ba Governo nia Programa, Governo bele husu voto de confiança ka bancada parlamentar ida bele propõe atu la simu programa ne’e. Parlamento bele mós, bainhira ¼ husi Deputados iha efetividade funções husu, vota moção de censura ida ba Governo kona-ba execução ba nia programa ka assunto seluk ruma ho interesse nacional relevante.

 

Tuir kbiit atu halo fiscalização mak Parlamento foti decisão kona-ba relatório atividades Governo nian, fiscaliza  execução orçamental no aprecia decreto-lei sira hodi halo alteração ka atu halo la vigora tan ona.

 

Nune’e mós Deputado sira bele halo inquéritos parlamentares kona-ba Governo no Administração Pública nia atuação, no mós halo perguntas no requerimentos ba Governo ka ba entidade pública seluseluk no simu informações escritas.

 

Ikus liu, Parlamento hala’o função decisão política, e nune’e hola decisão no halo opção ka hili dalan tuir interesses fundamentais Estado nian, no pratica atos ho relação ba órgão seluseluk, hanesan: aprova ka la aceita acordos no ratifica tratados no convenções internacionais; ratifica Presidente do Supremo Tribunal de Justiça nia nomeação no Presidente do Tribunal Superior Administrativo, Fiscal e de Contas nia eleição; hili membro ida ba Conselho Superior da Magistratura Judicial no mós Conselho Superior do Ministério Público; hili membro na’in-lima ba Conselho de Estado; hili Provedor de Direitos Humanos e Justiça; autoriza Presidente da República atu declara estado de sítio ka estado de emergência, iha caso ne’e liuhosi processo legislativo especial.

 

Parlamento Nacional nia Composição no Deputado sira-nia Eleição

Parlamento Nacional composto husi mínimo Deputado na’in-52 no máximo Deputado na’in-65, eleitos liuhosi sufrágio universal, livre, direto, hanesan, pessoal, secreto no periódico.

 

Deputado ida-idak eleito ba mandato ida ba tinan 5, corresponde ba período legislatura ida nian. Iha legislatura nia laran, cada tinan serbisu parlamentar nian corresponde ba sessão legislativa ida, hahú iha 15 Setembro cada tinan no remata iha 14 Setembro iha tinan tuir mai, no período normal funcionamento nian entre 15 Setembro cada tinan to’o 15 Julho iha tinan tuir mai.

 

Iha legislatura ida ne’e daudaun III Legislatura 2012-2017, Parlamento Nacional composto husi Deputado na’in-65.

 

Lei nº 6/2006 - Lei Eleitoral ba Parlamento Nacional, ho alteração hirak-ne’ebé hatuur iha Lei nº 6/2007 alteração dahuluk, 7/2011 alteração daruak, no 1/2012 alteração datoluk, halo tuir buat ne’ebé hakerek iha nº 3 husi artigo 93.º Constituição nian, determina maneira ba eleição Deputado sira Parlamento Nacional nian.

 

Naran cidadão timoroan ida ho tinan 17 ba leten, hela iha Timor-Leste, bele sai eleito nu'udar Deputado. Ema balu, tanba função ne’ebé nia kaer, labele sai eleito nu’udar Deputado ba Parlamento Nacional. Ne’e inclui Presidente da República, juiz no magistrado sira Ministério Público nian,  funcionários públicos, diplomatas, membros polícia nian, amu-lulik sira no ministro culto nian,  no  membro sira Comissão Nacional de Eleições nian.

 

Ba Parlamento Nacional nia eleição iha de’it círculo eleitoral ida ne’ebé corresponde ba território nacional tomak. Nune’e Deputado ida-idak representa cidadão tomak nia interesse.

 

Partido político sira ka coligação partido sira-nian tem que apresenta listas plurinominais, ho candidato efetivo na’in-65 no, mínimo, candidato suplente na’in-25. Ba cada conjunto ho candidato na’in-haat, pelo menos na’in-ida tem que feto.

 

Cidadão eleitor ida-idak iha direito ba voto ida hodi hili lista sira-ne’e ida. Conversão husi votos ne’ebé lista ida-idak simu ba mandatos halo tuir método média aas liu husi Hondt.