Parlamentu Nasionál, liu husi Grupo das Mulheres Parlamentares de Timor-Leste (GMPTL) organiza komemorasaun loron Internasional Feto, ho tema “Garante, investe no Hametin Ekonomia Feto Timor nian ba Dezenvolvimentu”, iha loron 8 fulan marsu tinan 2024, iha resintu Parlamentu Nasional
Serimónia Komemorasaun ne’e presidi husi Prezidente Parlamentu Nasionál, Maria Fernanda Lay, hahu ho exekusaun Hino Nasionál no Minutu ida hakmatek, ne’ebé dirije husi Presidente Parlamentu Nasionál.
Prezidente Parlamentu Nasionál iha nia diskursu hato’o parabéns ba feto iha mundu tomak espesial ba feto Timor oan hotu, akresenta liutan katak, loron Feto mundial nudar oportunidade unika atu ema hotu kontinua luta ba direitu feto nian iha mundu no espesialmente ba feto iha Timor-Leste. Akresenta tan katak, Ita Kontinua hametin sosiadade ne’ebe justu, igualitária, no refleta ba inorme desafiu atu kombate kontra qualquer deskriminasaun no violensia jeneru nian hasoru feto, labarik feto, ema ho difisiente no vulnerável sira.
Iha fatin hanesan, Prezidente GMPTL, Deputad Aliança da Conceição Araújo mos iha nia diskursu hetete nesesáriu “kontinua fo honra ba heroína sira ne’ebe fo an ba mate hodi luta ba independensia no oferece sira nia vida ba independencia.Merese duni atu fo honra ba sira, ba sira ne’ebe husik hela ona mundu no mos sira ne’ebe agora hamutuk hela ho ita. Agradese ba feto maluk hotu nia luta to’o ohin loron hodi fo signifikativu ne’ebe klean ba iha komemorasaun loron espesial ida ne’e.”
Ikus liu Prezidente GMPTL, lori estrutura nia naran hato’o agradesementu klean ba hotu-hotu nia prezensa no apoio idak-idak iha loron importante ida ne’e.
Serimónia ne’ebe hetan mos apoiu hosi UN Women iha Timor-Leste ne’e remata ho koa kek no loke sampaiu nudar simbolu ba unidade no forsa feto nian hodi kontinua luta ba direitu feto nian iha mundu no espesial iha Timor-Leste.
Konvidadu sira ne’ebe marka prezensa iha serimonia ne’e mak hanesan, Deputadus, Membru Governu, Deputada Assembleia Konstituinte sira; Ex-Deputadas husi Legislatura da-huluk to’o da-lima nian, Ex-membru Governu da-huluk to’o da-waluk nian; Representantes Feto husi Setor Justiça nian; Presidentes Autoridade Munisipal sira, Embaixadora sira, Representante feto husi instituisaun FFDTL, PNTL, Representante Chefe Suku sira, Representante Konfisoens Religioja sira, Esposa Eis Prezidente Repúblika, Cidália Lopes Mouzinho; Representante Organizasaun Nasionál no Internasional sira; Representante hosi Assosiasaun sira, no konvidadu seluk hotu. FIM
