Pagina Inicial»Noticia
Prezidente Parlamentu Nasionál, Maria Fernanda Lay, reprezenta Prezidente Repúblika, José Ramos-Horta, partisipa iha XIV Konferénsia Xefe Estadu no Governu CPLP nian, ne’ebé hala’o iha loron 27 fulan agosto, iha Palácio dos Congressos, Sidade São Tomé, São Tomé e Príncipe.
XIV Konferénsia ne’e marka inisia prezidénsia São Tomé e Príncipe ba períodu 2023-2025, troka República de Angola.
Iha reuniaun ne’e hetan prezensa husi Xefe Estadu no Governu Angola, Cabo Verde, Guiné-Bissau, Guiné Equatorial, Portugal, Moçambique no São Tomé e Príncipe.
Durante reuniaun, Prezidente Parlamentu Nasionál aprezenta kandidatura Dr. Zacarias da Costa ba mandatu ida-tan ba tinan rua hanesan Sekretáriu Ezekutivu CPLP, no iha konferénsia refere foti fila fali Dr. Zacarias da Costa ba kargu ne’e.
Iha nia intervensaun, sita lema prezidénsia são-tome, “Juventude e sustentabilidade na CPLP”, Prezidente Parlamentu mós aproveita oportunidade ne’e hodi manifesta pozisaun Timor-Leste kona-ba desizaun junta militar Myanmar nian espulsa enkarregadu negósiu hamutuk Embaixada Timor-Leste iha Myanmar no manifesta solidariedade ba Povo Myanmar. FIM
