Pagina Inicial»Noticia
Parlamentu Nasionál liu husi sesaun plenária ordinária iha loron 28 fulan agosto tinan 2023, hili ona nia reprezentante ba Konsellu Superior Defeza no Seguransa, ho 53 votu a favor no 2 votu branco.
Reprezentante sira ne’ebé hetan eleitu mak hanesan Deputadu Duarte Nunes (CNRT), Deputada Maria Terezinha Viegas (CNRT) no Deputadu David Mandati Dias Ximenes (FRETILIN), ne’ebé proposta refere aprezenta husi Bankada CNRT ho FRETILIN.
Iha sesaun plenária ne’e mós Bankada KHUNTO aprezenta deklarasaun polítika ne’ebé ko’alia kona-ba merenda escolar iha território tomak ne’ebé presiza hadi’a no melhoria atendimento inklui hahán ne’ebé saudável.
Sorin seluk Komisaun D aprezenta nia relatóriu fiskalizasaun ba Munisípiu Covalima relasiona ho perfurasaun mina-matan iha munisípiu refere no Komisaun F aprezenta relatóriu fiskalizasaun ba HNGV, SAMES relasiona ho falta ai-moruk reajente sira seluk.
Entretantu iha intervensaun diversa nian, Deputadu sira kontinua preokupa falta ai-moruk iha sentru saúde sira inklui HNGV, estrada ligasaun Viqueque, kondisaun eskola sira, situasaun seguransa iha kapitál Díli no asuntu importante sira seluk.
Sesaun plenária ne’e prezide husi Prezidente Parlamentu Nasionál interina, Maria Terezinha Viegas, akompaña husi membru Meza sira no hetan prezensa husi Vise-Ministru Asuntu Parlamentar, Adérito Hugo da Costa. FIM
