Pagina Inicial»Noticia
Parlamentu Nasionál iha loron 19 fulan jullu tinan 2023, halo ona apresiasaun ho unanimidade ba Programa IX Governu Konstitusionál.
Apresiasaun programa Governu ne’ebé hala’o iha loron daruak diskusaun programa IX Governu Konstitusionál ne’e hahú ho intervensaun Deputadu sira nian kona-ba prioridade sira iha programa Governu nian no tuir kedas resposta husi Primeiru-Ministru, Kay Rala Xanana Gusmão.
Ikus husi intervensaun sira ne’e, Prezidente Parlamentu Nasionál, Maria Fernanda Lay, fó tempu ba bankada parlamentar sira hodi halo deklarasaun final.
Iha deklarasaun bankada sira ne’e, Bankada FRETILIN liu husi Xefe Bankada, Deputadu Aniceto Longuinhos Guterres Lopes, fó apresiasaun ba programa refere no deklara katak FRETILIN la iha objesaun no kolabora ho objetividade no garante ba governasaun refere hodi ukun too tinan lima. Ikus husi deklarasaun Bankada FRETILIN ne’e husu retira hikas votos de confiança ba programa Governu.
Entretantu bankada parlamentar PLP no KHUNTO mós apresia programa refere no promete sei kontribui no sai opozisaun konstrutiva durante governasaun.
Sorin seluk, bankada parlamentar CNRT ho PD kontinua enkoraja governu atu realiza programa refere hodi responde ba nesesidade povu nian.
Primeiru-Ministru, Kay Rala Xanana Gusmão, husu kolaborasaun no apoiu husi entidade hotu hodi kontribui ba dezenvolvimentu nasionál.
Sesaun debate ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Primeiru-Ministru, Kay Rala Xanana Gusmão ho membru governu sira. FIM
