Pagina Inicial»Noticia
Parlamentu Nasionál iha loron 18 fulan jullu tinan 2023, hahú ona debate ba programa IX Governu Konstitusionál ne’ebé aprezenta ona iha semana kotuk.
Iha debate programa liu husi sesaun plenaria ne’e hahú ho subtituisaun temporaria husi Deputadu balun no tuir kedas ho intervensaun husi Primeiru-Ministru, Kay Rala Xanana Gusmão, kona-ba programa sira ho prioridade hirak ne’ebe Governu sei halo durante tinan lima nia laran hanesan reafirma Estadu Direitu Demokratiku; Dezenvolvimentu Kapital Sosiál; Dezenvolvimentu Infraestrutura sira; Dezenvolvimentu Ekonomia; Konsolida Governasaun no Promove Governasaun Diak no Kombate Korupsaun.
Hafoin aprezentasaun husi Primeiru-Ministru, Bankada Parlamentar sira halo intervensaun liga ba programa governu nian no hetan kedas resposta husi Primeiru-Ministru.
liu husi diskusaun naruk, Prezidente Parlamentu Nasionál ho autorizasaun bankada sira deside taka sesaun debate loron dahuluk refere tuir guiaun ne’ebe aprovadu tanba la iha ona inskrisaun ba intervensaun husi Deputadu sira, nune’e sesaun debate refere kontinua fila fali iha loron 19 fulan jullu tinan 2023.
Sesaun debate ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Primeiru-Ministru, Kay Rala Xanana Gusmão, no nia membru governu sira. FIM
