Pagina Inicial»Noticia
Parlamentu Nasionál liu husi reuniaun Plenaria dahuluk ba VI Lejizlatura, iha loron 22 fulan juñu tinan 2023, hili ona Deputada Maria Fernanda Lay, sai Prezidente Parlamentu Nasionál ba VI Lejizlatura periodo 2023-2028.
Reuniaun plenaria dahuluk ba VI Lejizlatura ne’e abertura husi Prezidente Parlamentu Nasionál sesante, Deputadu Aniceto Longuinhos Guterres Lopes, kontinua kedas ho ezekusaun Hino Nacional, intervensaun Prezidente Parlamentu Nasionál sesante no aprovasaun ba Komisaun Verifikasaun Poder.
Hafoin aprovasaun relatoriu husi Komisaun Verifikasaun Poder, kontinua kedas ho juramentu ba Deputadu sira eleitu no substituisaun ba Deputadu eleitu sira hanesan Deputadu Kay Rala Xanana Gusmão, Deputadu Francisco Guterres Lu-Olo, Deputadu Mari Bin Amude Alkatiri no Deputadu Tito Cristovão Lere Anan Timur antes anúnsiu kona-ba kandidatura ba Prezidente Parlamentu Nasionál.
Nune’e, Bankada Parlamentar CNRT ho PD tuir rejimentu ne’ebe mak iha, aprezenta kandidatu uniku ba Prezidente Parlamentu Nasionál VI Lejizlatura nian mak Deputada Maria Fernanda Lay.
Liu husi votasaun sekretu, Deputada Maria Fernanda Lay eleitu ho 45 votus a favor, 0 kontra, 19 abstensaun no 1 nulu.
Ho rezultadu votasaun refere, kontinua kedas ba pasazen kadeira prezidensial ba Prezidente foun hodi Prezidente Parlamentu Nasionál foun hala’o nia diskursu antes ensera sesaun plenaria refere.
Reuniaun plenaria dahuluk ne’e marka prezensa husi reprezentante orgaun soberania sira no konvidadu sira seluk inklui familia Deputadu eleitu sira. FIM
