Pagina Inicial»Noticia
Reprezentante povu no intelektual Caisido Munisípiu Baucau, iha loron 28 fulan jullu tinan 2021, halo audiénsia ho Prezidente Parlamentu Nasionál, Aniceto Longuinhos Guterres Lopes, iha sala konferénsia Parlamentu nian.
Durante audiénsia, reprezentante povu no intelektual sira aprezenta preokupasaun ba Prezidente Parlamentu Nasionál relasiona ho planu dezenvolvimentu TL Cement iha área Caisido nian, ne’ebe tuir komunidade sira seidauk iha klarifikasaun klean ba komunidade sira husi autoridade kompetente inklui kompana rasik, antes halo eksplorasaun.
Porta-voz intelektual Caisido, Ivo da Costa hatete povu tomak Caisido nian sei la impede prosesu dezenvolvimentu maibé importante tebes husi prosesu dezenvolvimentu refere la bele halo povu sai vitima.
Povu no intelektual sira Caisido husu ba Governu no kompaña atu indentifika rai hirak ne’ebe atu harii fabrika tanba iha área balun ne’ebe konsidera rai eransa no kultura ne’ebe la bele loke fábrika.
Prezidente Parlamentu Nasionál apresia ho pozisaun povu no intelektual sira Caisido nian, ne’ebe kontinua alerta no informa beibeik preokupasaun hirak ne’ebe atu orienta duni dezenvolvimentu ida ne’ebe halo povu sai vitima.
Prezidente Parlamentu Nasionál husu ba povu Caisido tomak atu la bele impede dezenvolvimentu, no kontiua kontribui ba autoridade kompetente inklui kompana rasik hodi harii fabrika ida ne’ebe fo benefisia ba povu tomak liuliu povu Caisido.
