Pagina Inicial»Noticia
Parlamentu Nasionál liu husi Sesaun Plenária extraordinária Komisaun Permanente nian, iha loron 27 fulan jullu tinan 2021, autoriza Prezidente Repúblika, Francisco Guterres “Lu-Olo”, hodi dekreta Estadu Emerjénsia ba dala 16º iha teritóriu nasionál ho durasaun loron 30, hahú iha loron 1 fulan agosto 00h00 too loron 30 fulan agosto tinan 2021, 23h59.
Sesaun plenária ne’e rasik loke husi Prezidente Parlamentu Nasionál, hafoin kontinua ho leitura ba giaun nomos mensajen Prezidente Repúblika nian husi Sekretária Meza Komisaun Permanente nian, Deputada Domingas dos Santos.
Husi mensajen ne’e, Prezidente Repúblika deskreve kona-ba impaktu husi pandemia SARS-CoV-2 iha mundu ne’ebé hamate ema rihun ba rihun, nune’e mós variante Delta ne’ebé sirkula ona mundialmente no iha ona sudeste asiático inklui nasaun indonésia. Timor-Leste deteta ona ema nain ha’at positivu variante Delta iha inisiu fulan jullu. Rejista kazu ativu konfirmadu covid-19 hamutuk ema na’in 695 (atus neen sai-nulu resin-lima), husi total kazu 10.348 (rihun-sanulu, atus tolu haat-nulu-resin-ualu) dezde fulan marsu tinan 2020 no rejistu kazu mate hamutuk ema na’in 26 (rua-nulu-resin-neen) iha teritoriu nasionál.
Tanba ne’e importante tebes Estadu Timor-Leste kontinua implementa Estadu Emerjénsia nune’e Governu bele kontrola no previne di’ak liu tan kontajiu moras refere ba komunidade. Entretantu medida sira mantem hanesan ho Estadu Emerjénsia anterior, no kontínua konsentra ba prevensaun no kombate covid-19 no variante delta.
Iha intervensaun Deputadu sira nian, kestiona impaktu husi implementasaun Estadu Emerjénsia ba populasaun nia moris loron-loron, nune mós subsídio ba pessoal liña frente sira balun ne’ebé to’o agora seidauk selu; além de ne’e, Deputadu sira, sujere ba Governu atu iha implementasaun Estadu Emerjensia ida-ne’e, labele taka prosesu aprendizajem iha eskola nomos atividade relijiozu, maibé, tenki mantein no kumpri regras protokolu saúde mundial; mantem seguransa metin iha fronteira terrestre no marítima nomos pontu entrada sira.
Autorizasaun ba deklarasaun Estadu Emerjénsia ne’e Deputadu sira Komisaun permanente liu husi votasaun nominal aprova Projeto de resolução n.º 78/2021 - Autorizasaun ba renovasaun Deklarasaun Estadu Emerjénsia, ho 18 votu a favor, 0 kontra no 13 abstensaun. Nune’e autoriza Xefe Estadu hodi dekreta Estadu Emerjénsia ba dala 16º.
Hafoin de aprovasaun, Prezidente Parlamentu anúnsiu ba plenáriu katak, tuir lei rejime Estadu Emerjensia no Estadu Sítiu, wainhira komisaun permanente aprova ona, plenáriu Parlamentu Nasionál tenki konfirma fila fali autorizasaun ne’e. Tambá ne’e, Deputadu sira Komisaun Permanente aprova Projetu Deliberasaun nº 3/V/3ª – konvokatóriu Parlamentu Nasional, hodi realiza plenária extraordinária iha loron 9 fulan agostu tinan 2021, ho 29 votu a favor, 0 kontra no 2 abstensaun.
Sesaun plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira no hetan prezensa husi Ministru Presidénsia ba Konsellu Ministru sira, Fidelis Leite Magalhães reprezenta Primeiru-Ministru, hamutuk ho Membru Governu sira seluk, nomos ekipa Sala Situasaun nian.
