Pagina Inicial»Noticia
Komisaun E ne’ebe trata asuntu Infraestrutura, hala’o fiskalizasaun iha Munisipiu Ermera, iha loron 23 too 24 fulan juñu tinan 2021.
Atividade fiskalizasaun ne’ebe lidera husi Prezidente Komisaun E, Deputadu Abel Pires da Silva, akompaña husi membru Komisaun nian ne’e hahú ho observa estrada no valeta ligasaun Gleno ba Ermera Antigu no Fatubessi.
Iha loron tuir mai, Komisaun E kontinua ba observa mota ne’ebe sobu komunidade sira-nia uma iha Suku Tali-Moro, Aldeia A3, mota Maudiu iha Suku Fatuquero no projetu estrada ligasaun Suku Matata ba Suku Leorema Posto Administrasaun Bazartete.
Durante fiskalizasaun ne’ebe akompaña diretamente husi Obras Públika Munisipiu Ermera ne’e, Komisaun E sujere atu halo manutensaun ba estrada no valeta inklui drenagem ne’ebe estraga ona.
Komisaun E mós observa estrada ligasaun Tibar ba Gleno ne’ebe fatin barak hahu aat ona, nune’e presija halo manutensaun.
Vise-Prezidente Komisaun E, Deputadu Fabião Oliveira, hatete husi projetu sira ne’e progresu mesmu hetan defikuldade atu finaliza tuir nia tempu tanba situasaun serka sanitária, entretantu Komisaun E mós sujere ba Governu liuliu kompaña sira atu halo manutensaun ba estrada hirak ne’ebe hetan estragus.
