Pagina Inicial»Noticia
Parlamentu Nasionál liu hussi sesaun plenária ordinária, iha loron 03 fulan maiu tinan 2021, Deputadu sira halo diskusaun no aprovasaun ba Proposta de Lei (PPL) n.º 25/V/3ª, que Estabelece o Regime Jurídico das Associações Públicas Profissionais, aprova ho 45 votu a favor, 0 kontra no 6 abstensaun no PPL n.º 26/V/3ª, sobre a Ordem dos Advogados aprova ho 45 votu a favor, 0 kontra no 6 abstensaun.
Hafoin aprovasaun iha jeneralidade ba Proposta Lei rua ne’e, Meza anunsia no entrega hikas ba komisaun kompetente, hodi kontinua halo diskusaun no aprovasaun iha espesialidade, hafoin sei agenda hodi halo aprovasaun final global iha plenária.
Iha sesaun plenária ne’e, Deputadu sira halo mós Votu Pezar ba Bento Pereira “Raihenek” ho votu 51 a favor, 0 kontra no 0 abstensaun.
Hafoin ida-ne’e Komisaun F ne’ebé trata asuntu Saúde, Seguransa Sosial no Igualdade Jéneru halo aprezentasaun relatóriu fiskalizasaun ba Munisipiu Manufahi ho Viqueque. Iha mós deklarasaun politika husi Bankada KHUNTO reprezenta husi Deputadu António Verdial, kona-ba situasaun real pandemia Covid-19 nian relativamente ho pólitika Governu nia jestaun ba sosa produtu lokal duke halo importasaun ba nesesidade bázika husi rai liur.
Iha intervensaun diversa nian, Deputadu sira kestiona problema sira hanesan; konferénsia imprensa ne’ebé realiza husi estudante balun nebe’e hateten Covid-19 hanesan asaun camuflado ida-ne’ebé atu asegura mandatu Governu nian to rohan; klinika privada sira presiza halo test swab ba pasiente sira ne’ebé mak ba halo tratamento; kestiona mós dezisaun politiku Prezidente Repúblika relasiona ho nomeasaun sira; precisa iha ordem implementasaun nebe’e rigor hodi kumpri regra sira kombate Covid-19, liu-liu iha Sentru Integradu Jestaun Krize nian, liga ho ema sira ne’ebé ba hato’o pedidu; precisa fasilidade izolamentu iha hospital sira, atu nune’e bele kura moras seluk hanesan ema monu tohar sira antes lori ba sala izolamentu Veracruz; eskuadra polisia Bekora la iha transporte; nune’e mós asuntu importante sira seluk liga ba situasaun atual ne’ebe mak povu ho nasaun enfrenta.
Ministru Asuntu Parlamentar no Komunikasaun, Francisco Jerónimo hateten, relasiona ho kestaun ne’ebe mak hato’o iha deklarasaun Bankada khuntO, Governu aloka ona osan iha orsamentu retifikativu hodi rezolve; problema sira seluk liga ho infraestrutura no rekursu humanu, Governu iha ona planu atu realiza tuir nesesidade; asuntu seluk, Governu toma nota no sei entrega ba ministériu relevante hodi rezolve.
Plenário ne’e mós halo konfirmasaun votu suspensaun ba funsaun Deputadu Adérito Hugo da Costa, hodi ba partisipa iha kontinuasaun prosesu judisial nian, ho 49 votu a favor, 0 kontra no 3 abstensaun.
Sesaun plenária ne’e prezidi husi Prezidente Parlamentu Nasionál, Aniceto Longuinhos Guterres Lopes, akompaña husi membru Meza sira, no hetan prezensa husi Ministru Asuntu Parlamentar no Komunisaun, Francisco Jerónimo.
