Forum Komunikasaun ba Valores Nasaun (F-KOVANA), ne’ebé lidera hussi Eládio Antonio Faculto de Jesus, ho nia equipa halo reunião ho Presidente Parlamento Nacional, Aniceto Longuinhos Guterres Lopes, iha loron 12 fulan outubro tinan 2020, iha gabinete Presidente nian.
Comité Diretivo F-KOVANA, Eládio Antonio Faculto de Jesus, hatete situação politica, económica, cultura no ética moral iha construção Estado de Direito Democrático sei hassoru problema no desafio oioin.
Realidade ne’ebé acontece horas ne’e daudaun, liuliu liderança politico sira la iha comunicação ne’ebé saudável no efetivo, hodi implica ba impasse política rai laran, no mossu insulto iha meios comunicação sira.
Tanba ne’e F-KOVANA hanessan fórum independente ida, hamossu iniciativa atu cria condição ida ba liderança sira oinsá bele iha dialogo no soluciona ba problema ne’ebé nação hassoru. No convergência nacional ne’e acto ida importante tebes hanessan mecanismo hodi ko’alia ba malu, nune’e hodi fó sentido ba luta libertação nacional.
Presidente Parlamento Nacional aprecia tebes ho iniciativa F-KOVANA nian atu bele cria comunicação, dialogo entre liderança nacional sira, partido politico hodi contribui di’ak liu ba desenvolvimento nacional.
Tanba dialogo hanessan chave hodi reuni força politica hotu ba interesse comum no moris di’ak povo nian.
