Vice-Presidente Parlamento Nacional, Maria Angelina Sarmento Lopes, halo abertura ba Simpósio Nacional CEDAW, iha Tower Fatuhada, iha loron 18 fulan agosto tinan 2020.
Iha discurso abertura ba atividade ne’e, Vice-Presidente Parlamento Nacional continua encoraja feto sira hodi participa ativa liu tan iha vida politica, economia, social no cultura.
Iha processo desenvolvimento nacional, questão igualdade género mós sai assunto importante ida no sai hanessan luta ida ba feto hotu hodi atingi meta tuir convenção internacional hanessan CEDAW (Committee on the Elimination of Discrimination Against Women).
Vice-Presidente Parlamento Nacional mós lembra katak horas ne’e daudaun participação feto iha vida politica no seluk tan avança liu compara ho nação sira iha Asia, exemplo de’it numero feto iha Parlamento Nacional atingi ona 40%, no continua esforço ba futuro ho colaboração feto hotu no serviço makas liu tan.
Evento Simpósio Nacional CEDAW ne’e ko’alia liu kona-ba progresso ho desafio implementação CEDAW durante tinan 18 iha Timor-Leste.
Simpósio ne’e organiza hussi organização sociedade civil sira hanessan Pátria, PLAN Internacional, UN Women no Rede Feto Timor-Leste.
