Pagina Inicial»Noticia
Parlamentu Nasionál liu husi sesaun plenária ordinária iha loron 29 fulan janeiru tinan 2024, nomeia ona Crescêncio dos Santos (efetivo) ho Ricardo da Costa Fernandes Hornai (suplente), ba Konsellu Superior Defensória Públika (KSDP), ho 32 votus a favor, 24 kontra no 0 abstensaun.
Eleisaun ba KSDP ne’e hala’o iha Período da Ordem do Dia nian, enkuantu iha Período de Antes da Ordem do Dia, Bankada Parlamentar FRETILIN, PD, PLP no KHUNTO aprezenta deklarasaun ne’ebé; Bankada FRETILIN ko’alia kona-ba desmantelamentu Bayu-Undan ne’ebe afeta ba sustentabilidade fiskál Estadu nian, Bankada PD ko’alia kona-ba situasaun edukasaun liuliu ba profesór sira kontratadu ho nia natureza kontratu ne’ebé antes ne’e iha, Bankada PLP ko’alia kona-ba polémika iha área saúde no edukasaun ne’ebé rezulta estudante sira sai vitima inklui pasiente sira iha klínika ho hospital sira, Bankada KHUNTO ko’alia kona-ba situasaun prisional, sita mós asuntu edukasaun no seluk tan.
Relasiona ho deklarasaun polítika sira ne’e, Vise-Ministru ba Asuntu Parlamentar, Adérito Hugo da Costa hatete, Governu kontinua tau prioridade ba asuntu sira ne’ebé Deputadu sira preokupa no rezolve tuir polítika no planu ne’ebé Governo define ona.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar. FIM
