Error message

Warning: A non-numeric value encountered in element_children() (line 6738 of C:\www.parlamento.tl\includes\common.inc).

Historia

Página Inicial » Historia

PREFÁCIO

Liu tiha tinan barak ho luta todan no resistência maka’as hasoru invasor, Timor-Leste consegue hetan hikas fali ninia independência iha 20 maio 2002. República Democrática de Timor-Leste sai hanesan Estado Soberano foun dahuluk iha IIIº Milénio, ho hun iha hakarak povo tomak nian no respeito ba dignidade ema nian.

Tuir Constituição, órgão soberania sira Timor-Leste nian maka Presidente da República, Parlamento Nacional, Governo no Tribunal sira.

Parlamento Nacional, ne’ebé eleito liuhosi voto universal, livre, direto, ho valor hanesan, secreto no pessoal, nu’udar órgão soberania República Democrática Timor-Leste nian ne´ebé representa cidadão timoroan hotu-hotu no iha kbiit hodi halo legislação, hala´o fiscalização no hola decisão política.

Iha câmara legislativa ida mesak. Knaar legislativo, além de reunião plenária sira, mós hala’o iha Comissão Especializada Permanente sira, no mós Comissão Permanente ne’ebé funciona de’it bainhira Parlamento tama ba recesso (tempo intervalo iha serbisu Parlamento nian) ka iha caso dissolução Parlamento nian.

Primeira Legislatura uluk eleito iha tinan 2001 atu sai Assembleia Constituinte, hodi halo Constituição Timor-Leste nian.

Ho entrada em vigor Constituição da República Democratica de Timor Leste nian, iha loron 20 de maio de 2002, Assembleia Constituinte transforma nian’an ba primeiro Parlamento Nacional iha Nação Timor-Leste, tuir artigo 167º Constituição da República.

Ninia Deputado dahuluk na’in-88 fahe ba Bancada Parlamentar 13, ne’ebé hatudu exemplo di’ak multipartidarismo nian. Importante atu sublinha katak, entre parlamentar sira-ne’ebé eleito, na’in-23 feto, ne’e katak mais ou menos 30%, ne’ebé tama entre taxa sira-ne’ebé aas liu iha mundo, no hatudu importância ne’ebé timoroan fó ba feto. Depois lei hatuur quota mínima ba candidata feto, ne’ebé agora daudaun exige katak tem que iha menos feto ida iha cada candidato na’in-tolu. Iha legislatura atual iha feto na’in-26 entre total Deputado na’in-65.

Parlamento Nacional nu’udar autoridade legislativa principal iha Timor-Leste. Nia iha competência exclusiva atu halo knaar sira hanesan tuir mai ne´e: halo legislação kona-ba questão básica sira política rai-laran no rai-li’ur nian, kona-ba direito, liberdade no garantia sira, política ba defesa no segurança, política fiscal, halo apreciação ba programa Governo nian, aprova Orçamento Geral Estado nian no fiscaliza execução orçamento nian, hanesan mós aprova acordo no ratifica tratado no convenção internacional sira. Bele mós fó autorização ba Governo atu legisla kona-ba assunto balu.

Parlamento Nacional hili no fó posse ba Provedor de Direitos Humanos e Justiça, ne´ebé iha kbiit hodi rona cidadão sira kesar hasoru Poder Público sira no kona-ba violação direitos humanos, no depois encaminha queixa sira-ne’e tuir dalan ne’ebé iha.

Parlamento Nacional nu’udar instrumento cidadão nian hodi exerce ninia direitos liuhosi democracia representativa. No hanesan mós lia-na’in ba vontade povo nian no instituição permanente atu continua hadi’ak nafatin Estado de direito democrático.

 

Edifício-Sede

La hanesan Palácio do Governo, ne´ebé harii iha tempo colonização Portuguesa, sede Parlamento Nacional nian, katak edifício principal, indonésio sira mak halo foin lailais ne’e, tinan hirak molok Timor-Leste sai nação independente.

Uluk fatin ida-ne´e jardim público ida, ne´ebé ema mai halo feira hodi celebra 10 de junho, loron Portugal nian.

Ho ocupação indonésia, jardim ida-ne´e sai fali fatin ba campo voleibol no basquetebol nian.

Bainhira indonésio sira harii fatin ne’e, ne’ebé horas-ne´e daudaun edifício Parlamento Nacional nian, sira utiliza ba fatin sorumutu governador nian ho chefe serviço autónomo sira, administrador Conselho sira no representante Governo Central nian iha Timor-Leste. Tanba arco sira-ne´ebé hale’u edifício central, ne’ebé halo ema hanoin kedas ba mesquita muçulmana ida, timoroan sira, liuliu iha Díli, reage la di’ak ba construção ne´e.

Iha 2001, Governo australiano fó osan hodi hadi’a filafali edifício ne´e, ne´ebé sai sede ba Assembleia Constituinte iha tempo ne’ebá.

Administrativamente Timor-Leste fahe ba:

  • 12 municípios: Covalima, Bobonaro, Liquiçá , Ermera, Ainaro, Manufahi, Dili, Aileu, Manatuto, Viqueque, Baucau no Lautem
  • no Região Autónoma Especial ida: Região Autonoma Especial de Oe-cusse e Ambeno (RAEOA)

Plenário nia decoração: Tais

Plenário nia decoração: Tais

Timor-Leste naran-boot la’ós de’it tanba ninia hena nia qualidade (kabas algodão no cor natural sira), maibé mós tanba técnica oioin hodi decora sasán ka tais sira.

Tais Timor-Leste nian iha papel importante tebes iha cerimónia lisan nian no, tanba grupo etnolinguístico ida-idak halo sira-nian ketaketak, ita bele haree diferença oioin iha tais sira-ne’e, iha estilo no técnica, no mós iha significado cultural.

Tais sira mós hatais iha cerimónia oioin, ritual religioso sira, hanesan lia-mate no lia-moris, hodi celebra mudança iha etapa ida-idak vida nian ka iha estatuto social, no mós iha cerimónia tuir lisan comunidade ida-idak nian ka cerimónia sira ne’ebé hala’o iha natar no to’os sira. Usa mós iha festa, no ema fó valor boot ba tais hodi halo troca entre membro comunidade sira.

Distrito ida-idak iha nia estilo no ilas tradicional rasik. Bainhira ita compara sira-nia tais, ita haree katak buat balu hanesan no balu la hanesan. Estilo no ilas hirak-ne’e iha significado boot ba timoroan sira.

 

Desenho sira nu’udar sistema ida hodi identifica linguagem lisan nian no representa ai-knanoik bei’ala sira-nian no sira-nia símbolo.

Iha ilha ne’e tomak, ema continua usa nafatin ilas tradicional, ne’ebé representa balada no buat sira natureza nian ne’ebé iha ligação ho ai-knanoik no cerimónia tuir lisan bei’ala sira-nian hanesan tuir mai ne’e: bele haree beibeik figura antropomórfica sira hanesan ema lolo liman, no mós representação zoomórfica sira hanesan manu-aman, manu-fuik, lafaek, kuda, ikan no balada sira bee nian; ai sira, ai-hun sira (hun moris nian no fukun mundo nian) no ai-tahan mós bele hare beibeik. Desenho geométrico sira, atu hanesan kail no losango, baibain matenek-na’in sira considera nu’udar interpretação cultura Dong Son nian. Mesmo bainhira ilas la iha ligação ho símbolo cultural, sira representa nafatin buat ruma ne’ebé la’ós atu enfeita de’it, por exemplo bele representa ema nia estatuto social, no seluseluk tan.

Tanba timoroan fó importância boot ba sira-nia tais no mós Parlamento Nacional hanesan povo nia lia-na’in, tais sira mai husi distrito hotu-hotu sai hanesan elemento ida de’it atu halo decoração ba Plenário. Ne’e hanesan forma ida hodi hatudu importância função representativa Parlamento Nacional nian.