Iha 12 dezembro, depois de aprovação dahuluk husi Presidente ho Secretário-geral do Parlamento Nacional, Grupo Trabalho foun, ne’ebé mosu atu continua serbisu Conceção e Construção ba portal eletrónico foun Parlamento Nacional nian, ne’ebé uluk hahú iha 2010, foin apresenta protótipo portal foun nian ba Mesa do Parlamento no ba Líder Bancada Parlamentar sira-nian, ho objetivo atu simu sugestão oioin husi órgão ne’e nia liderança.
Grupo trabalho ne’e inclui membro sira tuir mai ne’e: Adelino Afonso de Jesus, Diretor de Apoio Parlamentar, ne’ebé coordena, Guilhermina Barbosa, Chefe da Divisão de Relações Públicas, Comunicação e Educação Cívica, Abílio Caldas ho Horácio Abílio, respetivamente Chefe e técnico iha Divisão de Tecnologias de Informação e Comunicação, Alessandra Ronchi, Assessora ba Relações Públicas e Comunicação, Nuno França, Especialista kona-ba Tecnologias Informação e Comunicação nian, João Paulo Esperança, professor lian tetun nian, José Carlos Adão ho Elsa Miranda, rua hotu professor lian português nian.
Grupo trabalho nia knaar principal atu apresenta proposta completa ida ba portal eletrónico foun Parlamento Nacional nian, inclui aspeto hotu-hotu ne’ebé precisa ba funcionamento di’ak, nomeadamente web design, funcionalidade no solução tecnológica sira.
Iha 7 janeiro, ho presença husi Senhores Deputados ho Membros Governo nian, Presidente do Parlamento Nacional lança formalmente portal eletrónico foun Parlamento nian.
Portal ne’e nu’udar objetivo prioritário ida iha estratégia comunicação e informação nian husi Parlamento Nacional, no sai plataforma di’ak ba comunicação no atu fó-hatene informação kona-ba atividade parlamentar.
Ne'e página bilingue ne'ebé usa lian oficial rua Timor-Leste nian: tetun ho português, no hanesan Presidente do Parlamento Nacional hatete iha ninia mensagem hodi hato’o bem-vindo: “Liuhosi página ida-ne’e ami hakarak fahe informação ba ema hotu-hotu, bele iha rai-laran ka namkari iha mundo tomak, kona-ba serviço ne’ebé Deputado sira halo iha uma democracia nian ne’e no nune’e hakbesik liután ba cidadão sira”.
