Komisaun Nasionál ba Eleisaun (KNE) liu husi sesaun plenária ordinária iha loron 2 fulan abril tinan 2024, aprezenta nia relatório atividade kona-ba realizasaun eleisaun Prezidensial Repúblika no Parlamentu Nasionál.
Durante aprezentaun relatório ne’e, Prezidente KNE, José A. da Costa Belo Pereira, ne’ebe akompaña husi komisariu sira no estrutura KNE nian, relata kona-ba atividade tomak hahú husi preparasaun too rezultadu final husi eleisaun rua refere.
KNE rekoñese durante realizasaun eleisaun rua ne’e iha difikuldade balun maibé hatudu rezultadu diak tanba apoiu no koperasaun servisu husi komunidade, instituisaun Estadu liuliu orgaun eleitoral.
Iha aprezentasaun ne’e, Deputadu sira mós sujere atu KNE kontinua melhoria servisu liuliu preparasaun sira ba eleisaun sira tuir mai hanesan kamara munisipal no seluktan.
Sesaun plenária ba aprezentasaun relatório ne’e prezide husi Prezidente Parlamentu Nasionál, Maria Fernanda Lay, akompaña husi membro Meza sira. FIM
