Prezidente Parlamentu Nasionál, Maria Fernanda Lay, akompaña husi Vise-Prezidente na’in rua, Xefe Bankada sira, Prezidente Komisaun B, membru sira Komisaun Eventual ba Adezaun ASEAN no Sekretáriu-Jerál Parlamentu Nasionál simu vizita husi Sekretáriu Jerál ASEAN, Kao Kim Hourn ho nia delegasaun, iha Parlamentu Nasionál, iha loron 2 fulan abril tinan 2024.
Durante vizita refere, Prezidente Parlamentu Nasionál ho ekipa tomak aprezenta vontade no prontidaun Timor-Leste nian hodi adere ba ASEAN.
Tinan barak ona Estadu Timor-Leste liu husi nia instituisaun sira kria kondisaun no halo preparasaun maximu atu adere ba ASEAN tuir kriteriu ne’ebe mak estabelese ona.
Timor-Leste iha esperansa katak iha tempu badak sei sai full membership ba ASEAN tuir vontade no politika Estadu nian.
Iha oportunidade ne’e, Sekretáriu Jerál ASEAN mós partilla informasaun sira kona-ba ASEAN liuliu direitu no dever sira iha organizasaun ASEAN ne’ebe nia membru sira lao tuir.
Ba kestaun ne’e, papel Parlamentu Nasionál importante tebes oinsá apoiu no konsolida nafatin ho instituisaun sira seluk no hamutuk ho nasaun membru sira konkretiza politika ASEAN nian. FIM
