Pagina Inicial»Noticia
Parlamentu Nasionál liu husi reuniaun plenária ordinária iha loron 19 fulan fevereiru tinan 2024, aprova pedidu dezlokasaun Prezidente Repúblika ba Estado ba Emiradu Arabe Unidus, iha loron 24 no 27 fulan fevereiru tinan 2024, no ba Repúblika Demokrátika Popular Laos, iha loron 28 fulan fevereiru no loron 4 fulan marsu tinan 2024, ho 33 votus a favor, 5 abstensaun no 14 kontra.
Iha periodo da ordem do dia nian, Meza Parlamentu Nasionál mós anúnsia no biaxa ba Komisaun A ne’ebe trata asuntu Konstitusionais no Justisa, kona-ba Projetu Lei numeru 3/VI(1ª) – Rejime Juridiku kona-ba Ezersisiu Direitu Petisaun nian.
Entertantu iha período de antes da ordem do dia nian, Meza halo anúnsiu ba reprezentante Bankada Parlamentar sira hanesan PD; reprezenta husi Deputada Maria Teresa da Silva Gusmão (efetivu) no Deputado Manuel Henrique Noronha (suplente); Bankada KHUNTO Deputadu Luis Roberto da Silva (efetivu) no Deputada Irene Gonzaga Sarmento (suplente); Bankada PLP Deputadu Abel dos Santos (efetivu) no Deputada Maria Angelina Lopes Sarmento (suplente) ba Komisaun Eventual hodi akompaña prosesu adezaun ba Asosiasaun Nasaun sira Sudeste Aziatiku (ASEAN) nian.
Anúnsia mós substituisaun Deputadu sira iha Grupo Asembleia Parlamentar Komunidade Nasaun Lian Português (AP-CPLP) hanesan; Deputada Virginia Ana Belo (efetivu) hodi substitui Deputada Cedelizia Faria dos Santos no Deputada Bendita Moniz Magno (suplente).
Hafoin ida-ne’e anúnsia ba substituisaun Deputada Veneranda Eurico Lemos Martins ba Deputada Cedelizia Faria dos Santos (efetivu), iha Grupu Uniaun Inter-Parlamentar (UIP).
Iha sesaun plenaria ne’e halo distribuisaun no apresiasaun ba relatoriu fiskalizasaun Komisaun F ne’ebe trata asuntu Saúde, Seguransa Sosiál no Igualdade Jeneru iha Munisipiu Dili, no relatóriu Semináriu Nasionál no Konferénsia Munisipál Dili no Bobonaro kona-ba Protesaun Labarik no Joven sira. No distribuisaun no apresiasaun relatóriu fiskalizasaun ba Komisaun E ne’ebe trata asuntu Infraestrutura iha Munisipiu Ainaro, iha loron 24 no 26 fulan janeiru tinan 2024.
Entretantu Bankada Parlamentar FRETILIN aprezenta deklarasaun politika ne’ebe ko’alia kona-ba profesór sira voluntariu, hodi hamosu polemika no afeta ba prosesu aprendizajen. Bankada Parlamentar KHUNTO aprezenta deklarasaun politika kona-ba pozisaun Deputada Olinda Guterres liga ba karta husi Prezidente Partidu KHUNTO nian.
Iha intervensaun Deputadu sira nian kontinua preokupa ba asuntu sosiál sira liga ba pagamentu trabaladór sira iha area eletrisidade husi empreza sira, hadia sistema kanalizasaun bee nian, kontrolu ba sasan importasaun no seluk tan.
Reuniaun plenaria ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira. FIM
