Pagina Inicial»Noticia
Komisaun E ne’ebe trata asuntu Infraestrutura iha Parlamentu Nasionál hala’o atividade fiskalizasaun iha Munisipiu Baucau iha loron 15 fulan fevereiru tinan 2024.
Atividade fiskalizasaun ne’ebe lidera husi Prezidente Komisaun E, Deputadu Marcos Xavier akompaña husi membru komisaun nian ne’e hahú ho reuniaun entre Sekretáriu Munisipiu Baucau, Juvinal Daniel Filipe Belo, akompaña husi Diretor sira, iha Administrasaun Munisipal Baucau.
Durante reuniaun, Serektáriu Munisipiu hamutuk ho Diretor sira atualiza ba Deputadu sira kona-ba projetu sira ne’ebe implementa iha Munisipiu Baucau liuliu projetu hirak ne’ebe sei lao hela, hanesan irigasaun, estrada no melhoramentu bee-moos.
Iha aprezentasaun ne’e mós reponsavel EDTL Munisipiu Baucau informa katak komunidade husi Munisipiu Baucau tomak oras ne’e daudaun asesu hotu ona eletrisidade hahú husi nivel aldeia too munisipiu ka 100%.
Hafoin reuniaun, ekipa Diresaun Obras Publikas ho ADN Munisipiu Baucau akompaña membru Deputadu sira Komisaun E ba observa diretamente konstrusaun irigasaun iha mota Bahamori area Venilale nian ne’ebe estraga ona natar komunidade sira nian, no kontinua ba observa estrada iha area Venilale Vila ne’ebe nia konstrusaun paradu tinan hirak ona.
Prezidente Komisaun E apresia ba servisu diresaun sira iha Munisipiu Baucau, liuliu ba akompañamentu no monitoriza projetu sira ne’ebe lao iha Munisipiu Baucau. No Komisaun E sei informa ba Governu liu husi ministeriu kompetente atu rezolve preokupasaun sira liga ba prosesu konstrusaun projetu iha munisipiu refere. FIM
