Pagina Inicial»Noticia
Deputadu sira iha sesaun plenária loron 6 fulan fevereiru tinan 2024, kontinua fó hanoin no sujere ba Governu liu husi ministériu relevante sira hodi rezolve preokupasaun hirak ne’ebe povu enfrenta.
Preokupasaun sira ne’ebé durante ne’e povu enfrenta hanesan estrada, ponte, ne’ebé konsidera hanesan nesesidade importante hodi fasilita movimentasaun no kanaliza distribuisaun nesesidade bázika inklui sirkulasaun ekonomia komunidade nian.
Alem ne’e Deputadu sira mós sujere atu Governu fó atensaun ba preokupasaun traballadór timoroan iha rai-li’ur, liuliu oinsá fasilita administrativamente no dokumentu traballadór sira nian.
Sesaun plenária ne’e mós Bankada Parlamentar FRETILIN aprezenta deklarasaun polítika ne’ebé ko’alia kona-ba sustentabilidade fiskál liga ba fundu petrolífero ho situasaun atual kona-ba saúde no edukasaun. Bankada Parlamentar KHUNTO aprezenta deklarasaun polítika ko’alia kona-ba polémika rai Naktuka haree husi perspetiva istórika no legal.
Sesaun plenária ne’e prezide husi Prezidente Parlamentu Nasionál, Maria Fernanda Lay, akompaña husi membru Meza sira. FIM
