Pagina Inicial»Noticia
Grupo das Mulheres Parlamentares de Timor-Leste (GMPTL), iha loron 11 fulan jullu tinan 2023, halo ona eleisaun ba membru foun Meza GMPTL nian ba período 2023-2025 ho mandatu tinan rua ho balun iha VI legislatura ne’e.
Reuniaun ne’ebé hala’o iha sala GMPTL ne’e marka prezensa husi Deputada sira na’in 22 husi total Deputada 24 iha VI Lejizlatura nian.
Nune’e Deputada nain 22 refere, aprezenta lista kandidatura unika ba Meza GMPTL mak hanesan; Deputada Aliança da Conceição Araújo (Prezidente-GMPTL), Deputada Lucia Taeki (Vise-Prezidente) no Deputada Sancha Margarida Tilman (Sekretaria), tan ne’e liu husi votasaun, estrutura Meza GMPTL ne’e eleita ho 14 votus a favor, 0 kontra no 8 abstensaun.
Prosesu eleisaun refere hetan akompañamentu husi Sekretária Estadu Igualdade, Elvina Sousa de Carvalho, Xefe UN-Women iha Timor-Leste, Nishtha Satyam, Reprezentante Komisaun Funsaun Públika, Prezidente Rede Feto, Zelia Fernandes, Diretora Caucus, Terezinha Cardoso, Diretora Alola Fundasaun, Maria I. Guterres, Reprezentante Plan Internasionál, Laura Pina Lopes, Reprezentante IRI (International Republic Institution), Maria dos Reis no Diretora Fokupers, Maria Fatima P. Guterres.
Hafoin eleisaun, Prezidente sesante GMPTL, Deputada Lidia Norberta dos Santos Martins, entrega relatoriu atividade V Lejizlatura nian ba Prezidente GMPTL atual, no husu atu ekipa tomak inklui parseiru sira kontinua servisu hamutuk ba luta direitu feto nian. FIM
