Pagina Inicial»Noticia
Parlamentu Nasionál, liu husi Sekretariadu Jerál Parlamentu Nasionál selebra Loron Mundial Lian Portuguesa (Dia Mundial da Língua Portuguesa e Dia da Língua Portuguesa e da Cultura na CPLP) iha loron 5 fulan maiu tinan 2023.
Selebrasaun ida-ne’e hahú ho atividade vizita guiada husi estudante sira eskola sekundaria haat iha kapital Díli hanesan Eskola 4 de Setembro, ETI, 5 de Maio no Eskola Sekundario 10 de dezembro, hamutuk na’in haat nulu (40) hodi partisipa iha selebrasaun ne’e.
Vizita guiada ne’e hetan akompañamentu husi ekipa traballu Parlamentu Nasionál hanesan gabinete lingua portuguesa, Divizaun DIRICP, Rekursu Humanu no seluk, ne’ebe explika ba estudante sira kona-ba lala’ok no funsionamentu Parlamentu Nasionál inklui istoria Parlamentu Nasionál rasik.
Iha vizita refere, estudante sira hetan oportunidade hodi asisti direta sala plenaria, sala komisaun espesializada permanente sira inklui gabinete Prezidente Parlamentu Nasionál ho nia Vise sira no Sekretariadu Jerál.
Hafoin vizita guiada, estudante sira ne’e partisipa Quiz ne’ebe fasilita husi ekipa traballu Parlamentu Nasionál kona-ba materia hirak ne'ebe estudante sira hetan durante vizita guiada. No iha parte lokraik kontinua realiza atividade quiz ba funsionariu sira Parlamentu Nasionál.
Entretantu iha loron 6 fulan maiu, Parlamentu Nasionál kontinua partisipa iha eventu feira do livro iha Timor Plaza ba komemorasaun Loron Mundial Lian Portuguesa ne’e. FIM
