Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, akompaña husi Sekretáriu-Jerál, Adelino Afonso de Jesus ho Sekretáriu-Jerál Adjunto, João Rui Amaral, halo reuniaun jeral ho funsionáriu sira Parlamentu Nasionál, tekniku bankada parlamentar, tekniku sira orgaun autonomu sira iha Parlamentu Nasionál no asesor sira.
Reuniaun jeral ne’ebe hala’o iha loron 20 fulan jullu tinan 2022 ne’e koalia kona-ba servisu sira administrasaun parlamentar hodi apoia Deputadu sira iha funsionamentu Parlamentu Nasionál nian.
Prezidente Parlamentu Nasionál apresia servisu sekretáriadu jeral Parlamentu Nasionál durante 4º sesaun legislativa iha 5º sesaun legislatura ne’e, tanba tuir Prezidente Parlamentu Nasionál mezmu iha preokupasaun balun maibé maioria lao di’ak haree husi produtividade servisu parlamentar.
Sorin seluk, Prezidente Parlamentu Nasionál enkoraja funsionáriu sira atu mantem profisionalizmu iha ambiente servisu hodi la bele halis ba interesse politika, pontualidade no assiduidade durante horas servisu nian.
Durante reuniaun, funsionáriu sira mós aprezenta preokupasaun balun kona-ba servisu administrasaun parlamentar hodi bele hetan solusaun. FIM
