Pagina Inicial»Noticia
Parlamentu Nasionál liu husi sesaun plenária extraordinária iha loron 2 fulan juñu tinan 2022, aprova ona Proposta Lei n.o 40/V(4ª) - Grandes Opções do Plano (GOP) ba tinan 2023, iha jeneralidade ho 36 votu a favor, 15 kontra no 5 absntensaun.
Diskusaun no aprovasaun ne’e hahú ho ezekusaun Hino Nasionál no kontinua kedas ba leitura guião husi Sekretária Meza. Hafoin ida-ne’e Primeiru-Ministru, Taur Matan Ruak halo aprezentasaun ba Proposta Lei refere no tuir kedas aprezentasaun relatóriu no pareser husi Komisaun C ne’ebe trata asuntu Finansas Públikas.
Primeiru-Ministru hatete Governu konsidera relatóriu no pareser Komisaun C nian no promete kontinua hadia iha futuru, tanba reforma ne’ebe halo ne’e konsidera foun no importante tebes.
Lei Grandes Opções Planu tinan 2023 ne'e, kontein medidas ka atividades prinsipál hamutuk 263 no Programa 45 iha área estratéjiku 16 ne’ebé Governu sei foku iha tinan oin.
Proposta Lei GOP mós inklui estimasaun orsamentu plurianual hahú husi 2023 to’o 2027 nomos tetu agregadu ba OJE 2023 ho montante dólar amerikanu billaun $3,15 ne’ebé sei aloka ba Administrasaun Sentrál billaun $2,8, RAEOA millaun $120 no Seguransa Sosiál millaun $235,7.
Montante billaun $3,15 ne’e inklui ona Fundu Kombatentes Libertasaun Nasionál ho montante billaun $1 ne’ebé aprovadu ona iha Orsamentu Retifikativu.
Iha Proposta Lei das Grandes Opções do Plano ne’e, Ministériu Finansas mós aprezenta senáriu makroekonómiku ne’ebé prevê katak PIB la’ós-Petrolíferu iha tinan 2022 sei sa’e ba 2,9% no 3,1% iha tinan 2023 ho inflasaun 6,7% iha tinan ida-ne’e.
Ho aprovasaun jeneralidade ne’e, Deputadu sira kontinua halo diskusaun no aprovasaun iha espesialidade iha loron 3 too 7 fulan juñu tinan 2022, tuir guião ne’ebe aprovado. FIM.
