Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, halo reuniaun ho Prezidente Uniaun Inter-Parlamentar (IPU), Duarte Pacheco, iha okaziaun Konferénsia Mundial ba Prezidente Parlamentu sira, iha loron 8 fulan setembru tinan 2021, iha Repúblika Áustria.
Durante reuniaun diskute kona-ba importansia no prioridade sira ba futuru atu nasaun membru sira implementa, Prezidente IPU mós agradese ba partisipasaun Parlamentu Nasionál Timor-Leste iha Konferénsia Mundial ne’e, no promete sei vizita Timor-Leste iha tinan oin, iha Simeira CPLP ne’ebe Timor-Leste mak sai uma-na’in.
Prezidente IPU mós enkoraza Timor-Leste atu organiza didi’ak eventu Simeira CPLP ne’ebe ho prezensa nasaun membru sira husi CPLP nian no konvidadu sira seluk.
Prezidente Parlamentu Nasionál mós agradese ba Prezidente IPU nia prontidaun atu halo vizita ida ba Timor-Leste liuliu partisipasaun iha Simeira CPLP nian.
Hanesan membru IPU, Timor-Leste kontinua mantem no assegura ligasaun no hametin liu tan diplomasia parlamentar no hamutuk ho komunidade internasionál hodi kombate covid-19.
Alem de ne’e, Prezidente Parlamentu Nasionál mós halo reuniaun ho Vise-Prezidente Assembleia Repúblika Portugal, Edite Estrela hodi ko’alia kona-ba kooperasaun hirak ne’e lao tiha ona no plano no programa kooperasaun ne’ebe sei lao iha futuru.
Prezidente Parlamentu Nasionál mós agradese ba apoiu tomak Portugal nian durante ne’e liuliu iha pandemia Covid-19, oinsá atu combate vírus refere.
