Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, prezide serimónia komemorasaun Loron FALINTIL ba dala 46º iha Quartel Geral F-FDTL Fatuhada Díli, iha loron 20 fulan agosto tinan 2021.
Iha diskursu, Prezidente Parlamentu Nasionál hatete FALINTIL iha nia istoria ne’ebe metin ho povo tanba harii hodi defende nia povo ho soberania rai ida-ne’e.
Durante luta libertasaun nasionál, FALINTIL kaer metin luta armada ho nia kbiit rasik ho liberta nia povo no rai ida-ne’e. Iha luta ne’e FALINTIL mós ho apoiu Buibere/feto sira liuliu iha rede klandestina no seluk tan.
Tanba ne’e Estadu Timor-Leste halo esforsu barak ona hodi rekoñese no valoriza sakrifísiu husi eróis no mártires Pátria. Halo esforsu dadaun hodi dignifika liután vida kombatente sobrevivente sira-nian ne’ebé validadu ona, liu-husi pagamentu pensaun no subsídiu, hari’i uma, tratamentu saúde, atribuisaun bolsas de estudu ba oan sira no benefísiu sira seluk. Konsellu Kombatentes Libertasaun Nasionál hala’o hela verifikasaun dadus ba kombatentes ne’ebé rejista iha tinan 2009 no ita hotu hein katak iha tempu badak sei ramata servisu bo’ot ida ne’e.
Iha serimónia ne’ebe hetan prezensa mos husi veteranu sira, membru Governu, Deputadu sira, korpu diplomatiku sira no konvidadu sira seluk ne’e, halo mos promosaun ba ofisiais sira FALINTIL-FDTL.
