Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, fó pose ba Prezidente Komisaun Nasionál ba Eleisaun (CNE), José Agostinho da Costa Belo Pereira, ho membru sira hanesan Komisáriu Domingos Barreto, Komisáriu Antonino Gonçalves, Komisáriu Carlito Martins, Komisáriu Olávio da Costa Monteiro de Almeida, Komisáriu Alcino de Araújo Baris, no Komisária Odete Maria Belo, iha sesaun solene iha loron 16 fulan agosto tinan 2021, iha sala plenária Parlamentu Nasionál.
Prezidente Parlamentu Nasionál iha diskursu hatete iha demokrasia reprezentativa, eleisaun nu’udar momentu oportunu ba sidadun sira atu hatudu sira nia espetativa, sira nia opsaun politika no depozita sira nia konfiansa ba sé mak lidera Estadu no asume poder politiku, no sé mak sai sira nia reprezentante hodi reprezenta povu tomak nia interese.
Wainhira povu sei moris iha obskurantismu no opresaun iha formas oioin, liberdade laiha, nune’e mos laiha demokrasia. Wainhira povu hasoru forsa maior ruma nebe satan dalan ba espresa nia opsaun politika no depozita nia konfiansa, Estadu liu husi nia orgaun kompetente sira tenki tetu no disidi alternativas viaveis no justa.
Iha kontestu Estado de Direito Democrático de Timor-Leste ho nia organizasaun poder politiku, orgauns eleitoral nudar instrumentu atu garante sidadaun sira, no partidu politiku ezerse sira nia direitu eleitoral ho justu. Nee duni regime juridiku sira nebe sustenta realizasaun demokrasia eleitoral tenki nakloke ba mudansas, hodi fo dalan nafatin ba direitu no justisa eleitoral iha eleisaun sira.
Prezidente Parlamentu Nasionál mós fó votus susesu ba komisariu sira hotu no tekniku sira CNE nian hodi kontinua presta servisu ho kualidade.
Entretantu Prezidente CNE, iha diskursu hatete CNE hanesan servidor Estadu no servidor Demokrasia nune’e ho esforsu ba prinsipiu sira sei garante prosesu demokrasia ida dignu.
Ekipa tomak CNE sente orgullu ho konfiansa tomak husi orgaun soberania sira liuliu Parlamentu Nasionál ne’ebe hili ona Prezidente ho membru sira.
