Pagina Inicial»Noticia
Parlamentu Nasionál liu husi reuniaun plenária Komisaun Permanente iha loron 3 fulan agosto tinan 2021, aprova votu pezar ba matebian ativista Satsuki Eda, ho votu 28 a favor, 0 kontra no 0 abstensaun.
Hafoin votu pezar, iha intervensaun diversa nian, Deputadu sira hato’o preokupasaun sira kona-ba estrada nasionál no estrada rural inklui ponte ne’ebe maioria seidauk hetan atensaun, prosesu aprendizajen iha períodu pandemia Covid-19, prosesu vasina iha munisipiu sira, populasaun iha área balun seidauk asesu ba aletrisidade, ema moras mental iha kapital Díli, pagamentu ba liña frente sira, no asuntu sira seluk tan.
Hatan ba preokupasaun hirak ne’e, Ministru ba Asuntu Parlamentar no Komunikasaun Sosial, Francisco Martins da Costa Pereira Jerónimo, hatete Governu hahú rezolve ona preokupasaun sira ne’e, hanesan prosesu vasinasaun iha munisipiu sira kontinua lao liuliu iha kapital Díli, no maioria husi problema hirak ne’ebe Deputadu sira aprezenta Governu rezolve daudaun ona.
Entretantu iha Periodu Ordem do Dia nian, Deputadu sira halo dikusaun ho Ministru Ensinu Superior, Siensia no Kultura, Longuinhos dos Santos, ho ekipa, kona-ba pagamentu ba propinas ba estudante sira ensinu superior nian.
Durante diskusaun, Deputadu sira aprezenta preokupasaun sira liga ba propinas ba estudante sira ne’ebe balun seidauk simu, inklui mekanismu distribuisaun propinas nian.
Sesaun Plenaria ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi Sekretária Meza Komisaun Permanente, Deputada Domingas dos Santos, no hetan prezensa husi Ministru ba Asuntu Parlamentar no Komunikasaun Sosial, Francisco Martins da Costa Pereira Jerónimo, no Ministru Ensinu Superior, Siensia no Kultura, Longuinhos dos Santos, ho nia ekipa.
