Pagina Inicial»Noticia
Komisaun Nasionál ba Elisaun (CNE-sigla português) no Komisaun ba Funsaun Públika (KFP), iha loron 12 fulan jullu tinan 2021, aprezenta sira-nia relatóriu anual iha Plenaria Parlamentu Nasionál.
Aprezentasaun dahuluk husi CNE, aprezenta husi Prezidente CNE Komisariu Alcino Barris, akompaña husi komisariu sira seluk, ko’alia liu kona-ba servisu CNE nian durante ne’e inklui dezafiu hirak ne’ebe CNE enfrenta iha servisu loroloron nian.
Deputadu sira kontinua enkoraza komisariu sira inklui tekniku sira atu presta servisu ne’ebe di’ak liu tan liuliu oinsá garante eleisaun sira tinan oin mai ho di’ak.
Entretantu iha aprezentasaun tuir mai husi Komisaun Funsaun Públika nian, Prezidente Komisaun Funsaun Públika (KFP), Komisariu Faustino Cardoso Gomes, akompaña husi komisariu sira seluk, aprezenta kona-ba servisu sira KFP nian durante tinan 2020.
Além de ne’e ko’alia mós kona-ba analiza global ba administrasaun publika, oportunidade, dezafiu no estratejiku.
Deputadu sira kontinua enkoraza KFP atu hadia servisu diak liu tan hodi garante administrasaun publika ne'ebe profissional.
Iha intervensaun diversa nian, Deputadu sira aprezenta preokupasaun sira hanesan; osuariu iha Munisipiu Lautem ne’ebe kuaze la halo manutensaun, idozu ida ne’ebe konsidera sai vitima ba vasina iha Munisipiu Bobonaro, idozu balun la hetan subsidiu maske naran iha lista ministériu nian, estrada ba Munisipiu Covalima inklui munisipiu balun kontinua aat, konstrusaun estadiun Manatuto ne’ebe paradu, subsidiu ba estudante sira ne’ebe seidauk realiza, no assunto sira seluk.
Hatan ba preokupasaun hirak ne’e, Ministru Asuntu Parlamentar no Komunikasaun, Francisco Jerónimo, hatete Governu kontinua esforsu hodi rezolve preokupasaun husi Deputadu sira. Hanesan eletrisidade, Governu kontinua halo levantamentu ba área ne’ebe seidauk asesu inklui estrada sira.
Kona-ba vasina iha fatin balun la to’o, Governu liu husi ministériu kompetente atu avalia no responde ejijensia ne’ebe mak iha. Preokupasaun seluk, sei informa ba ministériu relevante sira atu rezolve tuir nesesidade ne’ebe mak iha.
Sesaun Plenária ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi membru sira no hetan prezensa husi Prezidente CNE ho nia ekipa, no Prezidente KFP ho nia ekipa.
