Presidente Parlamento Nacional, Aniceto Longuinhos Guterres Lopes, acompanha hussi Assessor Principal no mos Assessor Relações Internacionais e Cooperação, halo encontro ho embaixador Nova Zelândia nian, Phillip Hewitt ho nia comitiva, iha loron 03 fulan fevereiro tinan 2021, iha Gabinete Presidente Parlamento Nacional.
Objetivo hussi encontro ne’e, atu aborda questões sira kona-ba cooperação entre Parlamento Nacional ho Nova Zelândia iha área desenvolvimento Recursos Humanos, hodi reforça democracia no liberdade iha Timor-Leste.
Iha encontro ne’e, Presidente Parlamento Nacional afirma katak, Timor-Leste ho Nova Zelândia pais rua ne’ebé maka comunga princípio no valores ne’ebé hanesan kona-ba liberdade no democracia.
Presidente Parlamento mos hato’o agradecimento ba cooperação no apoio hussi Nova Zelândia nian mai Timor-Leste, antes no depois de independência ba desenvolvimento recursos Humanos no construção Estado foun hanesan Timor-Leste, apoio sira ne’e hotu, povo Timor-Leste tomak reconhece.
Presidente Parlamento Nacional manifesta desejo katak cooperação sira ne’e sei mantem no alarga tan ba área sira ne’ebé mais necessitado ba desenvolvimento Timor-Leste. Além de ne’e, foca especifico liu ba cooperação bilateral entre Parlamento Timor-Leste ho Parlamento Nova Zelândia, iha área desenvolvimento recurso humano hanesan atribuição bolso estudo ba técnico sira Secretariado Parlamento Nacional nian.
Ho nune’e, Sr. Embaixador Nova Zelândia, hatete, relaciona ho programa intercambio ne rassik, situação covid-19 halo buat barak sai difícil, dificulta processo atribuição bolsa estudo hodi haruka sai estudante bolseiro sira ba Nova Zelândia. Maibe, Nova Zelândia oferece bolsa ba curso inglês iha rai laran ho duração fulan tolu iha SOLS.
