Pagina Inicial»Noticia
Parlamento Nacional liu hussi Reunião Plenária ordinária, iha loron 16 fulan abril tinan 2019, halo voto de pesar ba saudoso Rolando Clementino Xavier dos Santos, ho 46 votos a favor, 0 contra no 0 abstenções.
Saudoso Rolando moris iha Município Baucau iha loron 19 fulan novembro tinan 1972 no hakotu iis iha Hospital Nacional Guido Valadares Díli, iha loron 14 fulan abril tinan 2019. Saudoso ne’e hussik hela feen kaben no oan na’in-tolu.
Entretanto intervenções diversas, Deputado sira congratula Chefe Negociador Principal, Kay Rala Xanana Gusmão, ne’ebé conclui ona pagamento ba sossa assoes Conocophilips no Shell Energy.
Deputado sira mós ko’alia kona-ba segurança liu-liu iha Posto Administrativo Bazartete Município Liquiçá, ne’ebé desconfia membro arte marciais balun halo problema, inclui assunto importante sira seluk.
Iha sessão Plenária ne’e Bancada FRETILIN mós halo declaração politica ne’ebé ko’alia kona-ba carta hussi administrador município balun ba Comissão Função Publica liga ba mandato cargo chefia sira-nian.
Ministro da Reforma Legislativa e Assuntos Parlamentares, Fidélis Manuel Leite Magalhães, confirma katak Governo liu hussi Chefe Negociador Principal conclui ona pagamento ba companha rua Conocophilips ho Shell Energy. Kona-ba assunto sira seluk, sei informa ba ministério relevante hodi buka solução.
Reunião Plenária ne’e preside hussi Vice-Presidente do Parlamento Nacional, Maria Angelina Lopes Sarmento, acompanha hussi membro da Mesa sira, no hetan presença hussi Ministro da Reforma Legislativa e Assuntos Parlamentares, Fidélis Manuel Leite Magalhães.
