Pagina Inicial»Noticia
Parlamento Nacional liu hussi reunião Plenária ordinária, iha loron 23 fulan outubro tinan 2018, hato’o saudação ba delegação atleta sira Timor-Leste nian ne’ebé participa iha evento ASIAN PARA GAMES tinan 2018 iha Indonésia, ho votação 44 a favor, 0 contra no 0 abstenções.
Participação atleta sira Timor-Leste nian iha evento ne’e sucesso tanba consegue hetan prémio mesmo hassoru atleta sira hussi nação avançado sira.
Iha sessão Plenária ne’e mós Presidente GMPTL (Grupo Mulheres do Parlamentar Timor-Leste), Deputada Lídia Norberta Martins, lori naran GMPTL hato’o parabéns ba feto Timor-Leste tomak liuliu feto iha área rural ne’ebé comemora loron internacional feto rural iha loron 15 fulan outubro.
Entretanto bancada FRETILIN liu hussi Deputado David Dias Ximenes «Mandati», hato’o declaração politica kona-ba heróis da pátria nian oinsá contínua defende interesse nacional no Estado soberano ida-ne’e ba oin.
Iha loron ida-ne’e mós Parlamento Nacional la autoriza deslocação Presidente da República ba República Indonésia, iha loron 28 fulan outubro to’o loron 1 fulan novembro tinan 2018, ho 19 votos a favor, 31 contra no 0 abstenção.
Reunião Plenária ne’e preside hussi Presidente do Parlamento Nacional em exercício, Maria Angelina Lopes Sarmento, acompanha hussi membro da Mesa sira no hetan presença hussi Secretario de Estado do Comunicação Social, Merício Juvenal dos Reis.
