Pagina Inicial»Noticia
Parlamento Nacional, liu hussi reunião Plenário extraordinário, iha loron 23 fulan agosto tinan 2018, halo Votos de Pesar ba matebian antigo Secretário-Geral das Nações Unidas, Kofi Annan, ho resultado votação 53 a favor, 0 contra, no 0 abstenções. No Votos de Homenagem ba Eis Administrador Transitório UNTAET e Representante Especial do Secretário-Geral das Nações Unidas iha Timor-Leste, Sérgio Vieira de Mello, ho votos 53 a favor, 0 contra no 0 abstenções.
Kofi Annan hakotu iis iha loron 18 fulan agosto tinan 2018 iha Berna, Suíça, ho idade tina 80. Enquanto Sérgio Vieira de Mello hakotu iis iha atentado terrorista iha Bagdad Iraque, iha loron 19 fulan agosto tinan 2003.
Votos de Pesar no Homenagem ba líder na’in rua ne’e hanessan reconhecimento ida hussi Timor-Leste ba contribuição iha processo luta libertação nacional no harii Estado ida-ne’e. Kofi Annan iha nia mandato hanessan Secretário-Geral ONU autoriza hodi realiza referêndum iha Timor-Leste, no assisti direta restauração independência 20 de maio iha Tassitolu Díli. No Sérgio Vieira de Mello, hanessan Administrador Transitório UNTAET fó contribuição makas hodi harii administração ba nação foun ne’e.
Iha votos de Pesar no Homenagem ne’e bancada parlamentar sira hato’o condolência ba falecimento líder na’in rua ne’e.
Reunião Plenária ne’e preside hussi Presidente do Parlamento Nacional, Arão Noé de Jesus, acompanha hussi membro da Mesa sira.
