Pagina Inicial»Noticia
Parlamento Nacional liu hussi sessão Plenária extraordinária iha loron 26 fulan julho tinan 2018, continua debate ba loron daruak Programa VIII Governo Constitucional.
Sessão debate ne’e hahú iha 09h30 dadeer ho perguntas hussi Deputado sira kona-ba área educação, saúde, turismo, liuliu desenvolvimento língua portuguesa inclui implementação lian materna iha ensino primário sira.
Assunto seluk ne’ebé Deputado sira questiona mak kona-ba projeto tassi-mane, participação feto iha área rural, no desenvolvimento económico.
Primeiro-Ministro, Taur Matan Ruak, iha nia resposta hatete VIII Governo iha esperança no sei esforço hodi concretiza assunto importante sira ne’ebé tau ona iha Programa VIII Governo Constitucional.
Durante resposta ba pergunta sira, Primeiro-Ministro mós fó tempo ba nia membro do Governo sira hodi resposta ba área temática ne’ebé tutela ba, hanessan Ministro de Estado e da Presidência do Conselho de Ministros, Agio Pereira, Ministro dos Negócios Estrangeiros e Cooperação, Dionísio Babo Soares, Ministra da Educação, Juventude e Desporto, Dulce de Jesus Soares, no Vice-Ministra para os Cuidados de Saúde Primários, Élia António de Araújo dos Reis Amaral.
Hafoin resposta hussi Governo, iha parte loraik continua ho pergunta sira hussi Deputado sira kona-ba desenvolvimento setor defesa no segurança, grupo vulnerável sira, administração publica no área cooperação ho nação desenvolvimento sira.
Nune’e Presidente do Parlamento Nacional, Arão Noé de Jesus, fó kedas tempo ba Governo hodi halo resposta.
Primeiro-Ministro iha nia resposta hatete Governo liu hussi nia programa ne’ebé mak iha sei responde ba preocupação no problema hirak ne’ebé povo tomak enfrenta hela, liuliu área hirak ne’ebé levanta hussi Deputado sira.
Debate ne’e Presidente do Parlamento Nacional encera iha 18h38 loraik no sei continua iha loron 27 fulan julho tinan 2018 ba loron datoluk nian.
Debate ne’e preside hussi Presidente do Parlamento Nacional, Arão Noé de Jesus, acompanha hussi membro da Mesa tomak, no marca presença hussi Primeiro-Ministro, Taur Matan Ruak, ho nia membro Governo sira.
