Pagina Inicial»Noticia
Comissão E Parlamento Nacional nian, ne’ebé trata assuntos Infraestruturas, iha loron 18 fulan julho tinan 2018, halo reunião ho Diretor do Banco de Desenvolvimento Asiático (ADB), Paolo Spantigati, hodi ko’alia kona-ba apoio hirak ne’ebé durante ne’e ADB fó ba estado Timor-Leste nian.
Diretor ADB hatete apoio hirak ne’ebé ADB fó ba estado Timor-Leste mak hanessan projeto estrada Díli-Ainaro, Díli-Baucau, projeto bee moos iha Município Manatuto no Oecússi no promete sei continua ba futuro hodi desenvolve nação foun ne’e.
Além de apoio monetário, ADB mós fó apoio técnico ba projeto sira ho nia acompanhamento too tinan tolu, continua halo controlo tuir sistema ADB nian, ho coordenação Ministério Obras Públicas nian.
Membro Comissão E sira preocupa ho manutenção estrada sira ne’e, inclui envolvimento trabalhador timoroan sira iha projeto ne’e, atu estrada hirak iha nia manutenção no controlo ne’ebé di’ak.
Presidente Comissão E, Deputado Abel Pires, agradece ba apoio tomak hussi ADB no informação hirak ne’ebé ADB fahe ba Deputado sira kona-ba projeto hotu ne’ebé apoio hussi ADB.
Reunião ne’e preside hussi Presidente Comissão E, Deputado Abel Pires, acompanha ho nia membro sira, no presença hussi Diretor ADB, Paolo Spantigati.
