Pagina Inicial»Noticia
Parlamento Nacional, liu hussi Secretariado-Geral do Parlamento Nacional realiza ona programa acolhimento ba Deputado sira V Legislatura nian, hahú iha loron 27 fulan junho too loron 29 fulan junho tinan 2018.
Objetivo hussi acolhimento ne’e atu fahe conhecimento no experiência ba Deputado sira, liuliu Deputado foun sira, kona-ba papel Deputado sira, inclui papel Parlamento Nacional tuir lei, nune’e bele ajuda di’ak liu tan Deputado sira hodi hala’o nia função.
Presidente do Parlamento Nacional, Arão Noé de Jesus da Costa Amaral, iha abertura ba atividade ne’e, hussu ba Deputado sira atu acompanha ho di’ak, nune’e bele iha conhecimento ne’ebé di’ak liu tan iha área parlamentar.
Orador sira ba seminário acolhimento ne’e mak: Vicente Guterres, Ex-Presidente do Parlamento Nacional; Fernanda Borges, Ex-Deputada; Josefa Álvares Pereira Soares, Ex-Presidente do Grupo de Mulheres Parlamentares de Timor-Leste (GMPTL) no atual Deputada hussi bancada FRETILIN; Jacinta Abu Cau Pereira, Ex-Deputada; Dimitar Stajcov, representante hussi Internacional Republican Institut (IRI); Adelino Afonso de Jesus, Secretário-Geral do Parlamento Nacional; João Rui Amaral, Secretário-Geral Adjunto do Parlamento Nacional; Sancha Margarida Tilman, Chefe Gabinete Relações Internacionais e Cooperação; no Bruno Lencastre, Assessor do Presidente do Parlamento Nacional.
Matéria principal durante programa acolhimento mak hanessan: Papel do Parlamento Nacional, Mandato do Parlamento Nacional, Processo Legislativo Comum, Papel do Grupo Mulheres Parlamentares, Orçamento Geral do Estado, Direitos da Oposição, Processos de Orientação e Fiscalização Política, Bancadas e Comissões Parlamentares, Diplomacia Parlamentar, Administração Parlamentar, Estrutura Orgânica do Secretariado-Geral e Plano Estratégico do Parlamento Nacional.
Durante atividade acolhimento iha mós sessão hussu no hatán ba matéria hirak ne’ebé apresenta hussi orador sira.
Presidente do Parlamento Nacional iha enceramento atividade ne’e agradece ba Deputado sira hotu inclui orador sira hotu ne’ebé partilha ona experiencia no conhecimento ba Deputado foun sira.
