Parlamentu Nasionál liu husi reuniaun plenária Extraordinária, iha loron 16 fulan abril tinan 2025, halo diskusaun no votasaun iha jeneralidade, espesialidade no final global ba Proposta Lei nú. 16/VI(2.ª)) – Alterasaun daruak ba Lei nú 25/2021, loron 2 fulan dezembru, Lei Organizasaun Judisiaria.
Iha intervensaun Ministru Justisa nian afirma katak, dispozisaun ba halo lei estruturante aplikavél hela importante teb-tebes, atu nune’e bele reforsa lei organizasaun judisiariu, liu-liu ba mandatu juiz Prezidente Tribunal Rekursu nian, ne’ebé sei termina iha loronn 28 fulan abril tinan 2025. Governu entende didiak kona-ba Lei nú 12/2022 ninian, ne’ebé hare ba prazu sira, nune mos ba rekrutamentu no estabelesimentu ba Tribunal Supremu, no mos Tribunal Superior ba Administrativu, Fiskal no Kontas ninian.
Alterasaun ba artigu balun iha proposta lei ne’e, fo kontinusaun ba lei 12/2022, hanesan solusaun ida, para atu bele fo biban ba Prezidente da Repúblika hodi exerce nia funsaun konstitusionalmente no legalmente iha nomeasaun ba Prezidente Tribunal Rekursu ka Tribunal Supremu. Kuandu Tribunal Supremu ka Tribunal Superior, Fiskal no Kontas seidauk estabelese.
Depois de intervensaun no diskusaun, plenáriu aprova iha jeneralidade ho votus 39 afavor, 18 kontra no 1 abstensaun; aprovazaun ba autorizsaun diskusaun espesialidade iha plenária ho votus 39 afavor, 18 kontra no 1 abstensaun.
Aprovasaun iha espesialidade, ba artigu balun husi lei ne’e, ne’ebé hetan alterasaun, mak hanesan, artigu 1º – objetu, aprova ho votus a favor 39, kontra 17 no abstensaun 1; Artigu 2º alterasaun artigu 77, ne’ebé aprova ho votus a favor 39, kontra 18 no abstensaun 1; Artigu 3º aditamentu artigu foun 76-A koalia kona-ba Nomeasaun Prezidente atual Tribunal Rekursu ho nia rekezitu sira, ho votus, 39 afavor, 18 kontra no 1 abstensaun; no Artigu 4º entrada em vigor, ho votus, 39 afavor, 18 kontra no 1 abstensaun.
Ikus plenáriu aprova iha final global Proposta alterasaun Lei Organizasaun Judisiária, ho votus 39 a favor, 18 kontra no 1 abstensaun
Sesaun plenária ne’e, prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Ministru Justisa, Sérgio de Jesus Fernandes da Costa Hornai, no Vise-Ministru ba Asuntu Parlamentar, Aderito Hugo da Costa. FIM
