Sekretariu-Jeral Parlamentu Nasionál, Edgar Sequeira Martins akompaña husi Diretora Gabinete Estudus Assessoria Parlamentar, partisipa reuniaun Assosiasaun Sekretariu-Jeral Parlamentar (ASGP), iha loron 6 too 9 fulan abril tinan 2025, iha Uzbekistan, Tashkent.
Iha reuniaun ne’e, Sekretariu-Jeral sira ko’alia kona-ba tema tolu ne’ebe komite ezekutivu determina ona;
Iha parte dahuluk, kona-ba formasaun no dezenvolvimentu kapasidade ba pesoál parlamentár sira. kona-ba tópiku ida-ne’e, Sekretáriu-Jerál sira fahe sira-nia esperiénsia no divulga métodu sira ne’ebé sira aplika iha sira-nia rain atu nune’e sira bele hetan apresiasaun husi Sekretáriu-Jerál sira seluk, hodi kontribui ba diskusaun sira no bele uza nu’udar referénsia ba posivel aplikasaun no dezenvolvimentu rekursu umanu iha Parlamentu ida-idak.
Parte daruak ko’alia kona-ba ekipamentu no instalasaun sira ne’ebé adapta ba ema ho defisiénsia, la’ós de’it fíziku, maibé mós vizuál no auditivu, iha Parlamentu sira. Kona-ba tópiku ida-ne’e, Sekretáriu-Jerál sira diskute kona-ba solusaun sira ne’ebé Parlamentu sira bele adota hodi fasilita asesu, la’ós de’it ba públiku, maibé mós ba funsionáriu no Deputadu sira ho defisiénsia. Iha nasaun balu, sekretariadu prepara tiha ona kondisaun adekuadu ba funsionriu públiku no Deputadu sira ho defisiénsia, maibe iha kontestu Timor-Leste nian, ida-nee sai hanesan referénsia ba implementasaun iha futuru.
Parte datoluk, nian kona-ba papél ou impaktu media sosial iha funsionamentu Parlamentar nian. Diskute kona-ba oinsá Parlamentu ida-idak bele optimiza asesu ba rede sosiál sira ba funsionamentu parlamentár, ba Deputadu no funsionáriu públiku sira. Impaktu negativu hosi rede sosiál sira konsidera bainhira, envezde aumenta produtividade iha operasaun parlamentár sira, sira desvia atensaun no prejudika dezempeñu. Iha nasaun balun, rede sosiál sira hanesan TikTok no Facebook hetan blokeiu durante oras serbisu nian no asesu ou estebelese fila-fali hafoin oras servisu.
Iha enkontru ne’e, Sekretáriu Jerál Parlamentu Nasionál Timor-Leste mós halo aprezentasaun kona-ba funsionamentu ita-nia Sekretariadu nian no dezafiu sira ne’ebé hasoru, nune’e mós forma oinsá atu hasoru, nu’udar kontribuisaun ba diskusaun iha eventu ida-ne’e.
Sekretariu-Jeral sira mos iha oportunidade halo eleisaun ba membru ezekutivu nain rua tamba iha vaga rua sei mamuk. Sekretariu Jeral sira halo eleisaun direta, iha eleisaun nee Sekretariu Jeral husi Afrika do Sul ho Sekretariu Jeral Turky mak eleitu hodi priense vaga rua ne’ebe mamuk. FIM
