Parlamentu Nasionál liu husi reuniaun plenária ordinária, iha loron 14 fulan abril tinan 2025, autoriza dezlokasaun ba vizita estadu Prezidente Repúblika ba Bulgária, entre loron 19 to’o 24 fulan abril tinan 2025, ho 37 votus a favor, 3 kontra no 8 abstensaun.
Deslokasaun oficial ida ne’e hanesan resposta ba konvite husi Sua Exelénsia, Prezidente Repúblika Bulgária nian, Rumen Radev, hodi realiza vizita servisu nian, iha lorn 22 fulan abril tinan 2025.
Aleinde vizita Estadu, Prezidente Repúblika sei hala’o mós vizita privadu ba nasaun Reinu Unidu husi loron 23 to'o loron 24 fulan-abril tinan 2025, atende konvite husi Reitoria Eton College, iha Windsor, Berkshire SL4 6DW, hodi partisipa iha palestra, ne’ebé previstu ba loron 24 abril 2025.
Alénde ne’e, aprova mos iha jeneralidade Proposta Lei nú 10/VI (1ª) – Rejime Juridiku ba Garantias Mobiliarias ho 39 votus a favor, 0 kontra no 14 abstensaun. Depois de aprovasaun iha jeneralidade, Plenáriu kontinua halo votasaun ba autorizasaun ba diskusaun espesialidade iha komisaun, ho votus 39 a favor, 11 kontra no 3 abstensaun.
Aprova mós votu pezar nú 5/2025, pezar no solidariedade ba vítima sira husi rai nakdoko ne’ebé akontese iha nasaun Myanmar no nasaun Tailândia, ho 58 votus a favor, 0 kontra no 0 abstensaun.
Iha sesaun plenaria ne’e, Meza mós halo anúnsiu kona-ba relatoriu fiskalizasaun Komisaun Ekonomia no Dezenvolvimentu iha Munisipiu Díli; Komisaun Infraestrutura iha Munísipiu Manufahi no Covalima. Depois de ne’e, kontinua ho Bankada Parlamentar sira hato’o deklarasaun polítika relasiona ho problema sira ne’ebé mak akontese iha ita nia rai laran. no Deputadu sira mos kontinua aprezenta kestaun seluk ne’ebé liga ba infraestrutura bázika, edukasaun, saúde, no kestaun importante sira seluk ne’ebé presija atensaun husi Governu.
Reuniaun plenaria ne’e prezide husi Prezidente Parlamentu Nasionál Maria Fernanda Lay, akompaña husi Membru Meza sira no hetan prezensa husi Ministru Interior, Francisco da Costa Guterres, Ministru Justisa, Sérgio de Jesus Fernandes da Costa Hornai, Vice-Ministra Finansas, Felícia Claudinanda Cruz Carvalho, no Vise-Ministru ba Asuntu Parlamentar, Aderito Hugo da Costa. FIM
