Parlamentu Nasionál liu husi reuniaun plenária ordinária, iha loron 8 fulan marsu tinan 2025, realiza aprovasaun ba votus de pezar nú 4/2025 konaba Pezar ba falesimentu Maria Olandina Isabel Caeiro Alves. Votu de pezar ne’e aprova ho unanimidade ho votus 55 a favor, 0 kontra no 0 abstensaun.
Saudosa mate iha loron 31 fulan marsu tinan 2025, iha nasaun Malásia, ho idade 74 anos, Matebian hanesan Lutadora incansável ba luta ba independencia nasionál, partisipa iha momentus historiku sira oin-oin ba luta libertasaun nasionál nian. ho ida ne’e, Parlamentu Nasionál, hato’o nia profunda kondolénsia ba nia família no belun sira ne’ebé enlutadu.
Alénde ne’e, iha mos distribuisaun ba Deputadu sira relatóriu fiskalizasaun husi Komisaun Finansas Públikas nian ba Banku Nasionál Komérsiu Timor-Leste (BNCTL); iha momentu hanesan Bankada Parlamentar KHUNTO hato’o deklarasaun polítika kona-ba despeju ne’ebé lao dadaun iha Díli laran; Iha periodu intervensaun diversas nian, Deputadu sira kontinua aprezenta preokupasaun ba problema sira hanesan; infraestrutura bazika, saúde, edukasaun, eletrisidade; estrada; no asuntu importante sira seluk ne’ebé presiza atensaun husi Governu no instituisaun relevante sira.
Iha periodu ordem do dia nian, Deputadu sira aprova edisaun jornal parlamentu Nasionál nian ho série A/nú 20, relativu ba loron 15 fulan setembru tinan 2023; I- A/nú 21, relativu ba loron 18 fulan setembru tinan 2023; I-A/nú 22, relativu ba loron 19 fulan setembru tinan 2023, no I-A/nú 128, relativu ba loron 7 fulan janeiru tinan 2025, ho votus 43 a favor, 0 kontra no 3 abstensaun.
Sesaun plenária ne’e, prezide husi Prezidente Parlamentu Nasionál, Maria Fernanda Lay, akompaña husi membru Meza sira. FIM
