Parlamentu Nasionál liu husi reuniaun plenária ordinária, iha loron 7 fulan abril tinan 2025, realiza eleisaun ba membru nain rua ba pozisaun membru Konsellu Imprensa nian.
Kandidatu nain rua mak hanesan Isabel Maria Fernandes de Jesus no Benevides Correia Barros, eleitu ho votus 38 afavor, 0 kontra no 7 abstensaun.
Alénde ne’e, iha períodu antes ordem do dia nian, Bankada Parlamentar FRETILIN hato’o deklarasaun polítika kona-ba servisu sira iha setor saude no setor edukasaun nian; Bankada PD koalia kona-ba soberania nasionál, integridade territorial no politika diplomasia internasionál Timor-Leste nian; Bankada KHUNTO hato’o lamentasaun kona-ba existensia Igreja Catolika Carismatiku Timor-Leste (ICCTL) no kona-ba liberdade mídia sosiál nu’udar fenómenu ida ne’ebé preokupante no la kontroladu, no mós hateten katak nia partidu defende atu halo revizaun ba pena sira iha lei Kódigu Penál, espesifikamente Artigu 140 no 207; no Bankada PLP koalia kona-ba valor justisa sosial, ekuidade no defeza ba direitu sira fundamental husi povu Timor-Leste no dezenvolvimentu sustentável.
Iha periodu intervensaun diversas nian, Deputadu sira aprezenta preokupasaun ba problema sira hanesan; saúde, edukasaun, eletrisidade; estrada; valeta; ponte no lixu; nune’e mós informasaun seluk hanesan, Chefe Suku Kolimau ko’a subsídio idosos ho valor $30 dolar; Pelicas Paradise taka estrada tuan parte Tasitolu; laiha kuadru avizu kompania nian relasiona ho projetu sira nebe mak lao hela; kria fatin estasionamentu publiku ba komunidade sira; no asuntu importante sira seluk ne’ebé presiza atensaun husi Governu no instituisaun relevante sira.
Sesaun plenária ne’e, prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa no Sekretariu Estadu komunikasaun Sosial, Expedito Dias Ximenes. FIM
