Parlamentu Nasionál liu husi reuniaun plenária ordinária, iha loron 20 fulan janeiru tinan 2025, Mesa anúnsiu admisaun no baixa ba Komisaun A, ne’ebé trata asuntu Konstitusionál no Justisa no Komisaun D, ne’ebé trata asuntu Ekonomia e Dezenvolvimentu, Proposta Lei n.º 13/VI (2.ª) – Kodigu Rekuperasaun no Insolvénsia.
Alén de ne’e, Mesa hato’o mos informasaun sira kona-ba relatóriu fiskalizasaun husi Komisaun Finansas Públikas ba Munisipiu Baucau no Bobonaro; Komisaun Ekonomia no Dezenvolvimentu ba Munisipiu Lautém; Relatóriu kona-ba partisipasaun iha reuniaun ba dala 149.º Uniaun Interparlamentar iha Genebra, husi loron 13 to’o 17 fulan outubru tinan 2024.
Iha okaziaun ne’e, Bankada Parlamentar FRETILIN, hato’o deklarasaun politika kona-ba setor edukasaun iha Timor-Leste. Bankada KHUNTO koalia kona-ba lista veteranus, eviksaun ba povu no infraestrutura bazika. Bankada CNRT responde ba polemika eviksaun ne’ebé halao husi IX Governu Konstitusional liu husi SEATOU hasoru okupante dominiu públiku, rai estadu, no fatin risku iha Díli no Munisipiu sira.
Entretantu, iha intervensaun diversas, Deputadu sira hato’o sira-nia preokupasaun relasiona ho difikuldade ne’ebé eziste iha setór oi-oin hanesan infraestrutura bazika, edukasaun, saúde, kontrole lixu, problema eviksaun ba povu, problema presu billete aviaun Díli ba Bali no Díli ba Oecusse ne’ebé karun, problema labarik kiik kontinua faan sasan iha dalan ninin, problema seguransa Guarda Lorosa’e no kestaun importante sira seluk ne’ebé precisa atensaun husi Governu.
Sesaun Plenária ne’e, prezide husi Prezidente Parlamentu Nasionál, Maria Fernanda Lay, akompaña husi membru Meza sira no hetan prezensa husi Vise-Ministru ba Asuntu Parlamentar, Aderito Hugo da Costa. FIM
