Comissão E hussi Parlamento Nacional, ne’ebé especializa ba assunto ho relação ba Infraestruturas, Transportes e Comunicações, hala’o visita fiscalização iha Distrito Lautém, entre 17-19 setembro 2014. Delegação ne’e compõe hussi Deputados hussi Comissão E, hussi Partido Político oioin, no mós hussi técnicos Parlamento Nacional nian.
Durante visita ne’e, Comissão nia Delegação hala’o reunião ho Administrador Distrito Lautém nian, iha Administração nia sede, ho presença hussi equipa CDD (Comissão de Desenvolvimento Distrital) no responsável local selusseluk, atu recolhe informação kona-ba atividades investimento nia situação no mós problemas ne’ebé hassoru iha Distrito ne’e, liuliu iha atividades no obras ne’ebé prevê iha Orçamento Geral do Estado, iha Programas de Desenvolvimento Distrital (PDD) I e II no mós iha Fundo de Infraestruturas.
Depois de reunião, delegação ba visita no haree didi’ak investimentos ne’ebé la’o daudaun no atividades iha terreno, atu bele hatene evolução serviço nian no execução ba obras ne’ebé halo foin daudaun no sira ne’ebé la’o hela, inclui obras ne’ebé remata iha tinan ida-ne’e.
Comissão E nia Delegação bá visita uluk Escola Técnico-Profissional de Lospalos, ne’ebé foin harii no funciona daudaun, no hetan oportunidade atu haree dificuldades balu projeto nian, no depois visita Edifício foun Direção de Terras e Propriedades nian.
Liutiha visita sira-ne’e, Comissão hetan informação kona-ba obras ba Reabilitação Estrada Lospalos/Vila nian, ho distância quilómetro 7, no tanbassá maka obras ne’e suspende hela. Iha loron ne’e nia rohan, delegação bá visita obras hodi harii Monumento homenagem ba Comandante Miguel Falutsai no Mártir selusseluk, ne’ebé la’o daudaun iha Subdistrito Lospalos/Vila.
Iha loron daruak hussi visita Distrito Lautém, delegação bá inspeciona estrada ne’ebé halo ligação hussi Lospalos ba Iliómar, ho distância quilómetro ruanulu (20 Km), no verifica katak serviço, iha fase ne’e, para completamente. Delegação buka hatene tanbassá mak situação ne'e acontece. Informação ne’ebé hetan maka existe dificuldade oioin ho contrato no ho projeto. Contrato la executa, agora ne’e daudaun, no serviço para no haree hanessan abandona hela obra, tanba iha divergência ho empreiteiro kona-ba contrato no Projeto.
Iha loron datoluk, delegação visita, hodi haree didi’ak, obras atu harii Estrada ne’ebé halo ligação Daudere-Buihomau-Luro, ne’ebé la’o hela, ho distância quilómetro ruanulu-ressin-rua (22 km), ne’ebé serviço sei continua to’o 2014 nia rohan, momento ne’ebé espera atu bele remata ona, tuir representantes hussi direção obra nian. Iha obra ne’e, iha trabalhador mais ou menos na’in-50 ne’ebé serviço agora daudaun, no mobiliza quantidade significativa equipamento no materiais nian, atu hala’o knaar ho folin 4.900 milhões USD, ne’ebé quase metade hussi valor ne’e ba knaar pavimentação nian.
Maski identifica problema balu no mós maski Governo autoriza tiha ona atu hanaruk prazo, serviço la’o lailais, no iha medidas balu ne’ebé foti tiha ona atu hadi’ak condições ne’ebé iha ba execução projeto no obra nian.
