OJE Retifikativu baixa ona ba Komisaun C ho karater urjénsia

Pagina Inicial»Noticia

Parlamentu Nasionál liu husi sesaun plenária extraordinária iha loron 29 fulan abril tinan 2022, baixa ona Proposta Lei Orsamentu Jeral Estadu Retifikativu 2022 nian ba Komisaun C ne’ebe trata asuntu Finansas Públikas no komisaun especializada permanente sira seluk hodi halo audiénsia ho Governu antes ba aprovasaun iha plenária.

Liu husi diskusaun naruk entre Deputadu sira ho Governu liu husi Ministru Finansa nian, Deputadu aprova Proposta OJE Retifikativu ne’e ho karater urjensia. Tanba ne’e Komisaun Espesilizada sira sei halo audiénsia ho Governu liu husi ministériu kompetente too loron 6 fulan maiu antes aprezenta ba plenária hodi hetan aprovasaun final global.

Proposta OJE Retifikativu ne’ebe Governu aprezenta hamutuk $ 1.129.857.250, hodi finansia medidas komplementar 13 hanesan;

1. Kriasaun Fundu Veteranu ho orsamentu alokadu billiaun $1.
2.  Atribuisaun Pagamentu Decimo Terceiro $200 ba kada família (exeptu funsionáriu públiku sira) ho orsamentu alokadu millaun $70.
3. Uma Kbiit Laek Plus ho orsamentu alokadu millaun $25.
4. Bolsa Estudu ba Mellór Graduadu Estudante Ensinu Báziku no Sekundáriu ho orsamentu alokadu millaun $7,5.
5. Programa Mão-de-obra ba Postu    millaun $7,2.
6. Revitaliza kafé no subsídiu ba kafé Laku-teen ho orsamentu alokadu millaun $6,4.
7. Pagamentu ba diferensa remunerasaun PNTL nian ho rejime salariál foun, ba membru PNTL 4.096 ho orsamentu alokadu millaun $5,1.
8. Harii Sede Arte Marsiál no Rituál millaun $2,5.
9. Programa Eskola iha Uma ho orsamentu alokadu millaun $2,1.
10. Internet gratuita iha eskola sira, millaun $1,1.
11. Subsídiu akomodasaun ba PNTL no F-FDTL ho orsamentu alokadu millaun $1,9.
12. Estabelesimentu Sekretaria ba Asuntu Traballadór iha rai-liur no Komunidade Timoroan iha Diáspora $500 mil.
13. Empregu ba mellór alunu universitáriu sira $437,5 mil.