Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, simu audiénsia husi Ministru ba Prezidénsia Konsellu Ministru, Fidélis Leite Magalhães, iha loron 13 fulan janeiro tinan 2022, iha Gabinete Prezidente nian.
Durante audiénsia diskute liu kona-ba lejizlasaun sira ne’ebé Governu envia ona ba Parlamentu Nasionál no halo balansu ida hodi bele halo diskusaun iha tinan ida-ne’e.
Hafoin reuniaun, Ministru ba Prezidénsia Konsellu Ministru hatete durante tinan 2021, Governu aprezenta lejizlasaun barak ba Parlamentu Nasionál ne’ebé hetan aprovasaun no promulgasaun husi Prezidente Repúblika.
Governu prepara ona lejizlasaun balun ne’ebé tuir planu iha tempu badak sei envia ba Parlamentu Nasionál hodi diskute no aprova.
Prezidente Parlamentu Nasionál apresia tebes servisu Governu nian liuliu iha lejizlasaun hirak ne’ebé Governu liu husi Ministru ba Prezidénsia Konsellu Ministru nia esforsu hodi finaliza no envia ba Parlamentu Nasionál.
