Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, akompaña husi Deputadu sira, iha loron 22 fulan outubro tinan 2021, partisipa iha kampanha vasinasaun Covid-19, iha Suku Soru Postu Administrativu Lospalos no iha Aldeia Kuluhun Suku Fuiloro, Postu Administrativu Lospalos, Munisipiu Lautém.
Kampanha vasinasaun ne’ebe hahú iha Suku Soru ne’e, Prezidente Parlamentu Nasionál akompaña mós husi Sekretáriu Estadu Komunikasaun Sosial, Mericio Juvenal Akara, reprezentante Ministeriu Saúde no ekipa saúde Munisipiu Lautém.
Durante kampanha vasinasaun, Prezidente Parlamentu Nasionál enkoraja komunidade sira atu partisipa maximu iha vasinasaun hodi proteje-an no kombate Covid-19, tanba too agora seidauk iha ai-moruk próprio hodi kura moras refere, nune’e solusaun ideal ba kombate no prevene Covid-19 mak vinasaun.
Atu atinji metas ne’ebe Governu preve, Prezidente Parlamentu Nasionál husu ba komunidade sira atu kolabora ho autoridade lokal sira liuliu pesoal saúde sira hodi tuir vasinasaun no lalika rona lia falsu sira iha media sosial.
Iha kampanha vasinasaun ne’e, halo mós vasinasaun door to door ka vizita direta ba komunidade hirak ne’ebe la konsege hakat ba sentru vasinasaun. Iha vasinasaun door to door ne’e komunidade sira antusiasmu tebes hodi simu Prezidente Parlamentu Nasionál ho ekipa saúde sira hodi vasina.
Prezidente Parlamentu Nasionál promete kontinua apoiu Governu liuliu Ministeriu Saude hodi fó susesu ba vasinasaun iha teritoriu tomak.
