Pagina Inicial»Noticia
Prezidente Parlamentu Nasionál, Aniceto Longuinhos Guterres Lopes, akompaña husi Vice- Prezidente sira, halo reuniaun ho Embaixadór Estadu Unidu Amérika nian, Charles Kevin Blackstone, iha Gabinete Prezidente Parlamentu Nasionál nian, iha loron 07 fulan abril tinan 2021.
Hafoin reuniaun, ba jornalista sira, Embaixadór hatete, reuniaun ida-ne’e ko’alia kona-ba relasaun bilateral entre Estadu Unidu Amérika ho Parlamentu Nasionál Timor-Leste, liuliu kona-ba programa sira ne’ebé mak parte rua servisu hamutuk, ezemplu; projetu multianual ne’ebe mak fornese husi Ajensia Estadu Unidu ba Dezenvolvimentu Internasional “USAID”.
Além de ne’e, ko’alia mós kona-ba apoiu ba programa kooperasaun ba tinan lima nian ne’ebe mak Estadu Unidu Amérika fó ba Timor-Leste, relasiona ho ida-ne’e, Embaixadór informa katak, Diretór USAID nian sei halo audiensia ho Ministériu kompetente hodi diskuti kona-ba programa sira ne’ebe mak relevansia hodi bele implementa. Total orsamentu ne’ebé mak Estadu Unidu Amérika fó mak dollar amerikanu millaun sia-nuluh-resin-tolu (93.000.000).
Iha parte seluk ko’alia mós assuntu mak hanesan, visita sira iha tempu pasadu husi membru kongresu halo vizita mai Timor-Leste, nomos membru Deputadu sira Parlamentu Nasional halo visita ba Kongresu iha Estadu Unidu Amérika; Ko’alia mós kona-ba dezafiu sira ne’ebe mak Timor-Leste hasoru durante pandemia Covid-19, ekonomia no inundasaun nomos valor husi demokrasia ho respeitu ba direitu humanu.
Reuniaun ne’e prezide husi Prezidente Parlamentu Nasionál, Aniceto Longuinhos Guterres Lopes, akompaña husi Vice-Prezidente nain rua, ho prezensa Embaixadór Estadu Unidu Amérika, Charles Kevin Blackstone.
