Pagina Inicial»Noticia
Parlamento Nacional liu hussi sessão plenária iha semana oin sei halo voto de pesar ba vitima sira acidente aéreo hussi avião Sriwijaya Air SJ 182 ne’ebé acontece iha loron 9 fulan janeiro tinan 2021, iha Indonésia.
Secretária Mesa Parlamento Nacional, Deputada Lídia Norberta dos Santos Martins, ne’ebe hanessan mós porta-voz Parlamento Nacional nian liu hussi conferência da imprensa hatete, liu hussi reunião líder bancada sira decide ona atu Parlamento Nacional halo voto de pesar ba vitima sira acidente aéreo iha Indonésia foin lalais ne’e.
Além de ne’e, plenária semana oin mós sei halo eleição ba membro na’in rua Conselho de Imprensa ne’ebe Parlamento Nacional adia iha segunda-feira liu ba.
Sorin seluk, Secretária Mesa mós informa kona-ba notificação hussi Tribunal de Recurso ba Parlamento Nacional kona-ba artigo balun iha Lei Orçamento Geral de Estado 2021 nian, ne’ebé bancada CNRT apresenta pedido fiscalização abstrata da constitucionalidade, iha loron hirak liubá, no tuir lei, Parlamento Nacional iha loron 30 atu fó resposta ba notificação refere.
Iha conferencia imprensa ne’ebé mós Porta Voz do Parlamento Nacional atualiza kona-ba serviço hirak ne’ebe Parlamento Nacional hala’o ona durante semana ida.
